Өнгөрсөн долоо хоногт дэлхийн улс орнууд аймшгийн баяр буюу хэллоуины баярыг тэмдэглэн өнгөрүүллээ. Канадын Куэбэк хотод дундад зууны үеийн иргэний дүрд хувирч япон илдээр зэвсэглэсэн этгээд хэллоуины баярын өдөр халдлага үйлдсэн хэрэг гарчээ.

24 настай эрэгтэйн гэмт халдлагыг бичлэгээр баталгаажуулсан бөгөөд тэрээр хоёр хүнийг сэлмээр хороож, таван хүнийг шархдуулсан байна. Куэбэк хотын цагдаагийн газар халдлагыг ямар нэг террорист бүлэгтэй холбоогүй ба хувь хүний зан байдлаас үүдэлтэй гэж ням гарагт мэдээлжээ.

Сэжигтний нэрийг Карл Гируард гэдэг ба түүнийг хүн амины гэмт хэрэг үйлдэхийг завдсан таван зүйл анги болон хүн амины нэгдүгээр зэргийн гэмт хэрэг үйлдсэн зэргээр Куэбэк хотын шүүх яллах дүгнэлт үйлдэх гэж байна. Сэжигтэн халдлагыг хотын төвд эртний түүхэн байгууламжийн орчимд үйлджээ. Халдлага гарснаас хойш гурван цаг орчмын дараа сэжигтнийг барьсан байна.

Ковид-19 цар тахлын тархалтын улмаас хот даяар хэсэгчлэн хөл хорио тогтоосон байгаа юм. Тиймээс баярын шөнө гадаа гудамжинд цөөн хүн таарсан гэж мэдээлжээ.

2017 онд тус хотод зэвсэгтэй этгээд сүмийн зургаан ажилтныг буудаж хөнөөснийхөө хариуд бүх насаараа хоригдох ял сонссон.

Эх сурвалж: The Guardian

---