Өнгөрсөн амралтын өдөр Сенегал орчимд цагаачдын хөлөг онгоц осолдож, дор хаяж 140 хүн амиа алдсан болохыг Олон улсын шилжилт хөдөлгөөний байгууллагаас мэдээлэв.

Сенегалын Мбур хотоос өнгөрөгч бямба гарагт 200 орчим зорчигч усан онгоцонд суун, Испанийн Канарын арлууд руу хөдөлсөн боловч онгоц удалгүй шатаж, Сенегалын баруун хойд эргийн ойролцоо живсэн байна. Зорчигчдоос ердөө 59 хүнийг аварч чадсан гэдгийг албаныхан тэмдэглэжээ.

Сенегалын эргээс Канарын арлуудыг зорьсон завинуудын тоо сүүлийн хэдэн долоо хоногт мэдэгдэхүйц нэмэгдсэн бөгөөд энэ удаагийн ослоор хамгийн их хүн эндсэн гэж НҮБ-ын Цагаачлалын агентлагаас онцолсон юм. Өнгөрсөн сард нийт 14 завь ижил төрлийн аялалд гарсан бөгөөд тэдний дөрөвний нэг орчим нь аливаа асуудалтай тулгаран, эсвэл осолдсон гэх мэдээлэл байгаа аж.

Далайн замаар аялж байгаа хүмүүсийн ихэнх нь Европын орнуудын виз авч чадаагүй ч мөнгө олж, гэр бүлээ тэжээхийн тулд энэхүү эрсдэлтэй аялалд гардаг байна. Олон улсын шилжилт хөдөлгөөний байгууллагын Сенегалын төлөөлөгчийн газрын дарга Бакари Думбиа энэ талаар "Цөхрөнгөө барсан залуучуудыг ашигладаг хүний наймаа, хууль бус тээвэрлэгчдийн сүлжээг татан буулгахын тулд Засгийн газар, тэдний түнш болон олон улсын хамтын нийгэмлэгүүдийн хоорондын хамтын ажиллагааг уриалж байна" гэв.

Эх сурвалж: Associated Press

---