“Нийслэлийн нийтийн тээвэрт дүүжин тээврийг нэвтрүүлэх төсөл”-ийн данснаас хоёр удаагийн гүйлгээгээр 22.2 тэрбум төгрөг Франц Улсын компани руу шилжсэн баримт ил болсон. Уг асуудлын талаар УИХ-ын гишүүн С.Амарсайхан тайлбар хийлээ.

-Таныг Нийслэлийн засаг даргаар ажиллаж байхдаа дүүжин тээвэр барих ажлыг тендергүйгээр гадаадын компанид өгсөн гэдэг асуудал гарч ирлээ?

-Энэ асуудал чинь өөрөө Монгол, Франц хоёр улсын Засгийн газар хоорондын 30 жилийн хугацаатай хөнгөлөлттэй зээлийн хөрөнгөөр хийгдэж буй ажил учраас ямар ч тендер зарлагдаагүй. Францууд энэ төслийг хэрэгжүүлж байгаа.

-22.2 тэрбум төгрөгийг Францын хоёр компанийн данс руу хувааж шилжүүлсэн баримт шилэндансанд тавигдсан байсан л даа?

-Тийм юм байхгүй, байхгүй. Мэдэхгүй. Тийм юмыг ёстой би сонсоогүй юм байна. Хорь гучин тэрбум төгрөг битгий хэл, хоёр гурван сандал ширээ авсан ч тендер, үнийн харьцуулалттай явагддаг юм шүү дээ. Саяны автобустай холбоотой асуудлыг яриад байгаа юм уу?

-“Нийслэлийн нийтийн тээвэрт дүүжин тээврийг нэвтрүүлэх төсөл”-ийн данснаас мөнгө гарсан баримт болсон?

-Ёстой мэдэхгүй юм. Сангийн яамнаас санхүүжилтын эрх нь нэгдээгүй, төслийн нэгж нь дөнгөж байгуулагдаад байгаа гэж би дуулсан.

-Францын “Пома групп”-ийн данс руу 22.2 тэрбум төгрөгийг шилжүүлсэн байсан?

-Францын “Пома групп” энэ төслийг хэрэгжүүлж байгаа. Аливаа Засгийн газар хооронд хөнгөлөлттэй зээлээр төсөл хэрэгжүүлсэн тохиолдолд тухайн хэрэгжүүлэгч нь Сангийн яамаараа дамжуулан мөнгөө аваад ажлаа явуулдаг. Түүнээс дундуур нь өөр ямар ч компани орох боломжгүй ш дээ.  

-Дүүжин тээвэр хэзээ ашиглалтад орох төлөвлөгөөтэй байсан бэ?

-Төлөвлөгөө ёсоор бол ирэх оны гуравдугаар сард ашиглалтад орох ёстой. Гэвч ковид-19 өвчин гарсан учраас хугацаанаасаа жаахан хоцорч орж магадгүй байна. Яагаад дүүжин тээврийг хэрэгжүүлэхээр болсон бэ гэхээр Баянхошуу, III, IV хорооллын арын хэсгийн айл өрхүүд автомашин явахад бэрхшээлтэй уулын энгэр бэл дагасан байрлалтай байдаг. Ийм бэрхшээлтэй нөхцөлд зам гүүр гэж зовохгүйгээр дүүжин тээвэр барих нь маш хялбар бөгөөд зөв шийдэл байдаг.

---