Пакистаны баруун хойд хэсэгт орших нэгэн шашны сургууль хичээлийн үеэрээ тэсрэх бөмбөгний халдлагад өртөн, долоон хүн нас барж, дор хаяж 80 хүн шархадсан байна. Дэлбэрэлтийн үеэр тус сургуульд 500 орчим сурагч байжээ.

Цагдаа нар эхлээд амиа алдсан хүмүүсийн дунд хүүхдүүд байсан гэж мэдэгдэж байсан хэдий ч бүс нутгийн эмнэлгийн удирдлагууд нас барсан хүмүүс бүгд насанд хүрэгчид байсан бөгөөд харин шархадсан хүмүүсийн дунд хэд хэдэн хүүхэд байгаа гэдгийг тодруулан мэдээлсэн байна.

Одоогоор аль нэгэн алан хядлагын бүлэглэл уг дэлбэрэлтэд хариуцлагатай гэдгээ мэдэгдээгүй байгаа бөгөөд мөрдөн байцаалтын ажиллагаа эхлээд байгаа аж. Цагдаагийн офицер Вакар Азимын хэлснээр Афганистантай хил залгаа оршдог Пешавар хотын "Jamia Zubairia" сургуульд хэн нэгэн хүн цүнх орхиж явснаас хойш хэдэн минутын дараа дэлбэрэлт болсон гэнэ. Мөн энэхүү тэсрэх бөмбөг зургаан кг тэсрэх бодис агуулж байсан гэдгийг Пешавар хотын Цагдаагийн газрын дарга Мохаммад Али Гандапур тэмдэглэжээ.

Түүнчлэн халдлагын улмаас шархадсан хэд хэдэн хүмүүсийн биеийн байдал нь хүнд байгаа учир нас барагсдын тоо нэмэгдэж магадгүй гэж эрх баригчид эмээж байна.

Эх сурвалж: Sky News

---