Дэлхийн 147 оронд байрлах БНСУ-ын дипломат төлөөлөгчийн газрууд сүүлийн таван жилийн хугацаанд нийт 92,415 ширхэг архи, согтууруулах ундаа хэрэглэсэн гэсэн судалгааг Өмнөд Солонгосын Гадаад харилцааны яамнаас гаргасан байна. Жилийн 52 долоо хоног, долоо хоногийн 5 өдөр нь ажлын өдөр гэж тооцвол дипломат төлөөлөгчдийн газрын ажилчид 5 жил буюу 7,100 хоногийн хугацаанд өдөр бүр 71 шил согтууруулах ундаа хэрэглэсэн гэсэн үг юм.

Энэхүү тоо баримтыг тус улсын Үндэсний ассамблейн Гадаад харилцаа, тээврийн хорооны төлөөлөгч Тэ Ёнг Ху өнгөрөгч даваа гарагт танилцуулжээ. Энэ нь тус улсаас гадаадад суугаа дипломат төлөөлөгчийн газруудын согтууруулах ундааны хэрэглээг олон нийтэд дэлгэсэн анхны тохиолдол аж. Дипломат төлөөлөгчийн газрууд эдгээр архи, согтууруулах ундааг Өмнөд Солонгосын татвар төлөгчдийн мөнгөөр тогтоосон төсвөөс худалдаж авдаг байна.

Тэгвэл эдгээр дипломат төлөөлөгчдийн газраас архи, согтууруулах ундааны хамгийн өндөр хэрэглээтэй нь БНСУ-аас Монгол Улсад суугаа Элчин сайдын яам аж. Тус Элчин сайдын яамныхан сүүлийн таван жилийн хугацаанд 8,168 шил согтууруулах ундаа хэрэглэсэн бөгөөд ажлын таван хоногоор тооцоход өдөрт 6.2 шилийг уусан гэсэн үг юм. Түүнчлэн нийт 8,168 ширхэг согтууруулах ундааны 4,013 нь шар айраг байсан гэнэ.

Үүний дараагаар жагссан Саудын Араб дахь ЭСЯ сүүлийн таван жилд 3,987 шил хэрэглэсэн бол Кувейт дахь ЭСЯ 2,722 шил, Бруней дэх ЭСЯ 2,722, Сингапур дахь ЭСЯ 2,649 шил архи тус тус уусан байна. Харин Руанда болон Филиппин дэх БНСУ-ын ЭСЯ сүүлийн таван жилд зөвхөн нэг шил архи хэрэглэсэн байжээ.

Төлөөлөгч Тэ Ёнг Ху энэ талаар "Гадаадад суугаа дипломат төлөөлөгчийн газруудын хэрэглэдэг бүх согтууруулах ундааг үндэсний татвар төлөгчдийн мөнгөөр тогтоосон төсвөөр худалдаж авдаг. Тиймээс Гадаад хэргийн сайд хяналт шалгалтын төлөвлөгөө боловсруулах ёстой. Одоогоор коронавирусийн цар тахлын улмаас газар дээр нь очиж хяналт шалгалт хийх боломжгүй тул цаг үедээ тохирсон арга замыг олж, хэрэгжүүлэх хэрэгтэй" хэмээн мэдэгджээ.

Эх сурвалж: news.kmib.co.kr

---