Вьетнам улсын эрх баригчид айсуй "Молаве" хар салхинаас сэргийлэн 1.3 сая хүнийг нүүлгэн шилжүүлэхээр бэлтгэж байна.

Салхины хурд нь цагт 125 км-т хүрсэн "Молаве" хар салхи өнгөрөгч даваа гарагт Филиппиний гол арал болох Лузоныг орхин хөдөлсөн бөгөөд ирэх лхагва гарагт Вьетнамд хүрэх төлөвтэй байгаа юм. Уг хар салхинаас үүдэлтэй хүчтэй борооны улмаас Филиппиний 11 бүс нутагт үер бууж, 7 газарт хөрсний гулсалт үүсжээ.

Вьетнамын Ерөнхий сайд Нгуен Суан Фук "Энэ бол өргөн хүрээний газар нутагт нөлөөлөх их хүчтэй хар салхи. Цэргүүд иргэдэд туслахын тулд бүх хүчээ дайчлан, нисдэг тэрэг, танк болон бусад шаардлагатай тээврийн хэрэгслийг бэлдэх хэрэгтэй" хэмээн мэдэгдэж, хар салхинд бэлэн байхыг уриалсан байна. 

Урт эрэг дагуу оршдог тус улс нь хар салхи, үер усны аюулд өртөмтгий байдаг. Вьетнамын эрэг дагуух мужуудын 11.8 сая орчим хүн үерийн аюулд өртөх өндөр эрсдэлтэй байдаг бөгөөд суурин газруудын 35 хувь нь хөл хөдөлгөөн ихтэй, хөрсний элэгдэлд орсон далайн эрэг дээр байрладаг аж.

Эр сурвалж: CNN

---