БНСУ-д улирлын томуугийн вакцинжуулалтад хамрагдсан зарим хүмүүс нас барах болсонтой холбогдуулан Сингапур улс Өмнөд Солонгосын хоёр томуугийн эсрэг вакцины хэрэглээг түр хугацаагаар зогсоож байгаагаа мэдэгджээ.

Ингэснээр тус улс Өмнөд Солонгосын вакциныг хэрэглэхээ больж байгаагаа олон нийтэд зарласан анхны улсуудын нэг болж байгаа юм. Сингапурт өнөөдрийг хүртэл томуугийн вакцинтай холбоотой нас баралтын тохиолдол бүртгэгдээгүй байгаа хэдий ч "SKYCellflu Quadrivalent" болон "VaxigripTetra" вакцины хэрэглээг зогсоох шийдвэр нь урьдчилан сэргийлэх арга хэмжээний хүрээнд хийгдсэн гэдгийг тус улсын Эрүүл мэндийн яам ба Эрүүл мэндийн шинжлэх ухааны газар ням гарагт хийсэн мэдэгдэлдээ онцолсон байна.

"SKYCellflu Quadrivalent" вакциныг Өмнөд Солонгосын "SK Bioscience" компани үйлдвэрлэдэг бол "VaxigripTetra"-г "Sanofi" компани үйлдвэрлэдэг аж. Сингапурын Эрүүл мэндийн шинжлэх ухааны газар нь Өмнөд Солонгосын эрх баригчидтай байнгын холбоотой байгаа бөгөөд тус улсад тохиож буй нас баралт томуугийн вакцинтай холбоотой эсэхийг тогтоох мөрдөн байцаалтын явцтай тогтмол танилцаж байгаа гэнэ.

Харин 2020-21 оны томуугийн улиралд зориулан авчирсан өөр хоёр вакциныг үргэлжлүүлэн хэрэглэж магадгүй гэж Сингапурын эрүүл мэндийн байгууллагууд мэдэгдсэн байна.

БНСУ-д өнгөрөгч даваа гарагийн байдлаар нийт 59 хүн томуугийн вакцинжуулалтад хамрагдсаныхаа дараа нас бараад байна. Гэвч тус улсын мэргэжилтнүүд эдгээр нас баралт болон вакцины хооронд шууд холбоо тогтоогоогүй тул улс даяарх вакцинжуулалтын хөтөлбөрийг үргэлжлүүлэн хэрэгжүүлэхээр болжээ.

Эх сурвалж: The Telegraph

---