Польшийн Ерөнхийлөгч Анджей Дуда коронавирусийн халдвар авсан нь тогтоогдсон болохыг түүний хэвлэлийн төлөөлөгч Блазей Спычалский өөрийн Твиттер хуудаснаа энэ сарын 24-ний өдөр зарлажээ.

Тэрээр "Ерөнхийлөгч Анджей Дуда өчигдөр коронавирусийн халдварын шинжилгээ өгсөн. Түүний хариу "Эерэг" гарсан. Ерөнхийлөгчийн бие сайн байгаа. Бид холбогдох эмнэлгийн тусламжтай байнгын холбоотой байгаа" хэмээн бичсэн байна.

Өдгөө 48 настай Ерөнхийлөгч Дудад хүнд шинж тэмдэг илрээгүй байгаа ба тэрээр хэдийд халдвар авсан нь тодорхойгүй байгаа аж. Тэрээр өнгөрсөн долоо хоногийн даваа гарагт Эстони улсын нийслэл Таллин хотод болсон арга хэмжээнд оролцон, Эстонийн Ерөнхийлөгч Керсти Калжулайд болон Болгарын Ерөнхийлөгч Румен Радевтай уулзсан байна. Одоогоор Ерөнхийлөгч Калжулайдын шинжилгээний хариу "Сөрөг" гарсан бол Ерөнхийлөгч Радев тусгаарлалтад ороод байгаа аж.

Тус улсын эрх баригчид энэ оны гуравдугаар сарын дундуур цар тахлын дэглэмийг хэрэгжүүлж эхэлсэн бөгөөд хөл хорио одоог хүртэл үргэлжилж байгаа юм. Ойрын үед халдварын тохиолдол өсөж байгаатай холбогдуулан Польшийн Засгийн газар энэ сарын 10-ны өдрөөс эхлэн улс даяар амны хаалтын өргөн хэмжээний дэглэмийг сэргээж, албан байгууллага, олон нийтийн арга хэмжээ болон гэр бүлийн цугларалтад хязгаарлалт тавиад байгаа аж.

Польш улсад өнөөдрийн байдлаар коронавирусийн нийт 254 мянга гаруй тохиолдол бүртгэгдэн, 4,400 гаруй хүн нас бараад байгаа юм.

Эх сурвалж: TASS, BBC

---