АНУ-ын Тагнуулын төв газрын шинжээч асан Эдвард Сноуденд ОХУ-аас байнгын оршин суух зөвшөөрөл олгосон болохыг түүний өмгөөлөгч өнгөрөгч пүрэв гарагт мэдэгджээ. Түүний орос өмгөөлөгч Анатолий Кучерена "Өнөөдөр Сноуден хугацаагүй оршин суух үнэмлэхээ гардан авсан" хэмээн орон нутгийн "Тасс" агентлагт ярьсан байна.

Э.Сноуден байнгын оршин суугч болох өргөдлөө энэ оны дөрөвдүгээр сард өгсөн боловч коронавирусийн цар тахал болон хөл хорионы дүрэм журмын улмаас Оросын Цагаачлалын албанаас шийдвэр гаргахад илүү их цаг хугацаа шаардагдсан аж. Түүнчлэн Сноуден ОХУ-ын цагаачлалын тухай хуульд 2019 онд гарсан өөрчлөлтийн ачаар байнгын оршин суух эрхээ авч чадсан байна.

Гэвч Сноуден одоогоор ОХУ-ын иргэншилтэй болох бодолгүй байгаа гэдгийг Кучерена тэмдэглэсэн юм. ОХУ-д чимээгүйхэн аж төрдөг ч үе үе Оросын засгийн газрын бодлогыг олон нийтийн сүлжээн дээрээ шүүмжилдэг Сноуден хэрэв шударга шүүхээр оруулна гэдгийг баталбал АНУ-д эргэж очиход бэлэн байгаагаа өнгөрсөн жил мэдэгдсэн.

АНУ-ын Үндэсний аюулгүй байдлын агентлагийн гэрээт ажилтан байсан Сноуден тус улсын Засгийн газрын иргэдийг хууль бусаар чагнан тандаж байсан үйл ажиллагааны нууц баримтуудыг олон нийтэд дэлгэснийхээ дараа АНУ-ын ял шийтгэлээс мултрахын тулд 2013 оноос хойш ОХУ-д амьдарч байгаа билээ.

Эх сурвалж: Associated Press

---