Гүрж улсын баруун хэсгийн Зугдиди хотын банкинд өнгөрөгч лхагва гарагт зэвсэгт этгээд халдан, банкны ажилчид болон үйлчлүүлэгчдийг барьцаалжээ. 

Тус улсын Дотоод хэргийн яамнаас нийт хэдэн хүн барьцаалагдсан болон барьцаалагч ямар шаардлага тавьсан талаар тайлбар өгөөгүй ч орон нутгийн хэвлэл мэдээллийн хэрэгслүүд халдагч 500 мянган ам.доллар бэлнээр шаардсан хэмээн мэдээлсэн юм.

Гүржийн үндэсний "Mtavari TV" сувгийн цацсан бичлэгт барьцаалагдсан хүмүүс банкны шалан дээр сууж харагдсан бол барьцаалагч этгээд цэргийн дүрэмт хувцас өмсөн, нүүрээ халхалсан байсан бөгөөд винтов буу барьсан харагджээ. Тус суваг мөн халдагчийг гар бөмбөгөөр зэвсэглэсэн гэж мэдээлсэн байна.

Тэгвэл уг халдагч этгээд хэсэг хугацааны дараа барьцаалсан хүмүүсийнхээ 43-ийг сулласан болохыг тус улсын цагдаа нар албан ёсоор мэдэгдсэн юм. Үүний дараагаар тэрээр гурван барьцааны хүнийг дагуулан барилгаас гарсан бөгөөд одоо түүний байршил нь тодорхойгүй байгаа гэж орон нутгийн хэд хэдэн хэвлэл мэдээллийн эх сурвалж мэдээлжээ. Түүнчлэн одоог хүртэл барьцаанд байгаа гурван хүний нэг нь зэвсэгт этгээдтэй хэлэлцээр хийж байсан орон нутгийн цагдаагийн дарга байж магадгүй гэсэн мэдээлэл байгаа юм.

Дотоод хэргийн яамнаас пүрэв гарагийн өглөө гаргасан мэдэгдэлд барьцаалагдаад байсан 43 хүнийг аюулгүй бүсэд шилжүүлсэн бөгөөд цагдаагийн ажиллагаа үргэлжилж байгаа хэмээн тэмдэглэсэн хэдий ч халдлага үйлдсэн этгээд барьцааны гурван хүний хамт банкнаас зугтсан тухай тайлбар өгөөгүй байна.

Эх сурвалж: Associated Press

---