Дэлхийн католик шашны тэргүүн Ромын пап Францис ижил хүйстэн хосуудыг иргэний нийгмийн хуулиар хамгаалах хэрэгтэй гэж боддогоо илэрхийлсэн байна. Ажиглагчид түүний энэ үйлдлийг ижил хүйстнүүдийн харилцааны талаар хувийн байр сууриа хамгийн тод томруун илэрхийлсэн явдал хэмээн үзжээ.

ОХУ-д төрсөн ч АНУ-д амьдарч уран бүтээлээ хийдэг найруулагч Евгений Афинеевскийн “Францеско” нэртэй попын амьдрал, сургааль, ажлын тухай баримтат кино лхагва гарагт Ромын кино наадмын дэлгэцэнд гарсан байна. Уг киноны зураг авалтанд зориулж өгсөн яриандаа пап энэ талаар дурдсан байна. Уг баримтат кино дэлхий дахины анхаарлын төвд орж байгаа боловч Католик шашинтны тэргүүн ижил хүйстнүүдийн талаар байр сууриа илэрхийлсэн нь илүүтэй анхаарал татжээ.

Тэрээр “ижил хүйстнээ сонирхдог хүмүүс гэр бүлтэй байх эрхтэй. Тэд ялгаагүй бурхны хүүхдүүд. Хэнийг ч зовоож, зүдгүүрт амьдралд нь хаяж гээж болохгүй. Бидний хийх ёстой зүйл бол тэдгээр хүмүүсийн эрхийг иргэний нийгмийн хуулинд тусгах ёстой. Ингэснээр тэд хууль ёсны дагуу хамгаалагдах болно. Би үүний төлөө л зогссон юм” хэмээн өгүүлсэн байна.

Францис пап ижил хүйстнүүдийн гэрлэлтийг хуулиар хүлээн зөвшөөрөхийг эсэргүүцдэг боловч тэднийг зарим нэг хуулиар хамгаалахыг дэмжжээ. Түүнчлэн баримтат киноны хэсэгт пап гурван хүүхэдтэй ижил хүйстэн хосыг сүмд очихыг уриалж буйг харуулсан байна.

Энэ жил 83 насыг зооглож буй Францис 2013 оноос хойш дэлхийн католик сүм хийдийг тэргүүлж байгаа юм. Аргентины нийслэлд төрсөн тэрээр Америк тивийн орнуудаас анх удаа сонгогдсон Ромын пап төдийгүй наймдугаар зуунаас хойш Европ тивээс өөр газраас сонгогдсон католик сүмийн анхны тэргүүн зэрэг олон талаар онцлог нэгэн билээ.

Эх сурвалж: ВВС

---