Эрүүл мэндийн яамнаас энэ сарын 19, 20-нд нийт 1195 коронавирусийн шинжилгээ хийхэд гурван иргэнээс халдвар илэрлээ.

Энэ сарын 19-нд Алтанбулаг боомтоор орж ирсэн ачаа тээврийн жолооч 40, 46 настай ОХУ-ын хоёр иргэн, Сиатлаас ирсэн нэг иргэний гурав дахь шинжилгээгээр коронавирус илэрсэн байна.

Ингээд манай улсад батлагдсан тохиолдол 327 болж, 312 иргэн эдгэрчээ. Өнөөдрийн байдлаар ажиглалтаас 298 иргэн гарч гэрийн ажиглалтад 9, сувилалд 5 хүн байна. ХӨСҮТ-д халдвартай 15 хүн эмчлүүлж байгаагаас 10 нь хөнгөн, тав нь хүндэвтэр байгаа юм.

Манай улсын хувьд энэ сарын эхээс зорилтод бүлгийн иргэдэд томуугийн эсрэг вакцин хийж эхэлсэн. Тэгвэл дархлаажуулалтад 398 мянга гаруй хүн хамрагдаж, 78.9 хувьтай байгаа юм. Цаашлаад 55 мянган гаруй хүн вакцин хийлгэх хүсэлтээ тавьсан байна. Иймд ЭМЯ-наас дахин 100 мянган тун вакцин захиалж авахаар болжээ.

ХӨСҮТ-ийн Дархлаажуулалтын албаны дарга О.Дашпагма: Нийт 398 мянга гаруй иргэдийг томуугийн вакцинд хамруулсан. Нийт нийлүүлэгдсэн вакцины 70 гаруй хувийг дархлаажуулахад зориулсан. Анх 6 сартайгаас 9 настай хүүхдийг вакцинд хамруулж байсан бол 10-13 настай хүүхдийг томуугийн эсрэг вакцинд хамруулахаар боллоо. Захиалсан вакцин ирэх сард ирнэ гэсэн тооцоо байгаа. Зорилтод бүлгийн иргэд томуугийн вакцинд хамрагдаагүй бол ирэх сараас ирэх вакцинд хамрагдаж болно. Томуугийн эсрэг вакцин тариулснаар томуугийн хүндрэлээс сэргийлж чадна.

---