Исланд улсын Ерөнхий сайд Катрин Якобсдоттир шууд ярилцлага өгч байх үед нь хүчтэй газар хөдөлжээ. Гэнэт хүчтэй газар хөдөлсний улмаас ярилцлага тасалдсан боловч Ерөнхий сайд хүлцэл өчин, нөхцөл байдлыг үл хайхран асуултандаа бүрэн хариулж дуусгасан байна.

Ерөнхий сайдын байшин газар хөдлөлтийн үед савлаж эхлэхэд тэрээр Вашингтон Пост сонины сурвалжлагчид цар тахлын үеийн аялал жуулчлалын талаар цахимаар шууд холбогдон ярилцлага өгч байжээ. Байшин савлаж эхлэх үед тэрээр ихэд гайхширсан байна.

Катрин Якобсдоттир “ээ бурхан минь, газар хөдөлж байна. Уучлаарай яг одоо энд газар хөдөлж байна” хэмээн уулга алдан сандарчээ. Гэвч удалгүй асуулт руугаа эргэн орж, инээмсэглэн “тиймээ энэ бол Исланд шүү дээ” хэмээн хэлж хариултаа үргэлжлүүлжээ. Дараа нь “би маш сайн байна. Байшин ч тогтвортой байлаа, санаа зовох зүйлгүй” хэмээн хариулжээ.

Энэ жил 44 настай Якобсдоттир 2017 оноос хойш Исландын Засгийн газрыг тэргүүлж байгаа юм. Түүнийг ярилцлага өгч байхад буюу орон нутгийн цагаар мягмар гарагт Исландын нийслэл Рейкьявик хотоос баруун урагшаа 10 км-т байдаг эргийн тосгон Харнарфьордурт 5,6 магнитудын хүчтэй газар хөдөлсөн гэж АНУ-ын Газарзүйн судалгааны газраас мэдэгджээ.

Нийслэл хотын эргэн тойронд газар хөдлөлтийн чичирхийллийн үеэр багахан гэмтэл гарсан тухай эх сурвалжууд мэдээлэв. Исланд нь олон арван галт уулаар хүрээлэгдсэн байдаг учир газар хөдлөлтийн идэвхтэй бүсэд байрладгаас газар хөдлөх нь түгээмэл үзэгдэл юм.

Өнгөрсөн тавдугаар сард Шинэ Зеланд улсын Ерөнхий сайд Жакинда Ардерныг коронавирусийн хорио цээрийг сулруулах талаар ярьж байхад нийслэл Веллингтоны ойролцоо 5,8 магнитудын хүчтэй газар хөдөлж, ярилцлагаа тасалдуулсан тохиолдол гарсан. Хэдийгээр камерын дуран салгалж байсан ч Ардерн инээмсэглэсээр жаахан газар хөдөлж, энэ хавьд чичирхийлэл мэдрэгдэж байна хэмээн найрсгаар хэлсэн юм.

Эх сурвалж: CNN

---