- Нүүр
- Улс төр
- Видео мэдээ
- Чуулган
- Нийгэм
- Хууль эрх зүй
- Соёл урлаг
- Хэрэг зөрчил
- LIVETV CONTENT
- Бусад категори
ХБНГУ-ын Парламентын гишүүн Гуннар Линдеманн "Nord Stream 2" төслийг хэрэгжүүлэх нь Герман Улсад зайлшгүй шаардлагатай хэмээн мэдэгджээ.
Тэрээр Оросын хийн хоолойг барихаас татгалзан, АНУ-аас цэнхэр түлш авах нь эрчим хүчний үнийг огцом өсгөхөд хүргэж, цар тахлын улмаас аль хэдийн орлого нь хохироод буй Германы жирийн иргэдэд хүнд цохилт болно гэж үзэж байгаа аж. Мөн тэрээр Герман дахь цахилгаан, эрчим хүч Европын холбооны бусад орнуудтай харьцуулахад хоёр дахин үнэтэй байгааг онцолсон юм.
Линдеманн "Вечерняя Москва" сонинд өгсөн ярилцлагадаа "Зөвхөн ОХУ-аас хямд үнээр нийлүүлсэн хийг хэрэглэснээр урт хугацааны туршид эрчим хүчний хангамжийг баталгаажуулж чадна. Энэ бол "Германы алтернатив нам"-ын эртнээс уриалж ирсэн зүйл. Герман улсад "Nord Stream 2" хэрэгтэй. Учир нь Оросын хийгүйгээр германчууд харанхуйд унах болно" гэжээ.
"Nord Stream 2" төслийн хүрээнд Оросын эргээс Балтын тэнгисээр дамжин Герман хүртэл жилд 55 тэрбум метр куб хий дамжуулах хүчин чадалтай хоёр хоолой баригдаж байгаа билээ. Энэхүү төслийг Европын Холбоонд өөрсдийнхөө шингэрүүлсэн байгалийн хийг сурталчилж буй АНУ, Украин болон Европын бусад хэд хэдэн улс орон идэвхтэй эсэргүүцэж байгаа юм.
2019 оны арванхоёрдугаар сард Вашингтоноос уг төсөлд хориг арга хэмжээ авч, барилга угсралтын ажилд оролцож буй компаниудыг барилгын ажлаа нэн даруй зогсоохыг шаардсан. Түүнчлэн энэ жил үүссэн Алексей Навальныйтай холбоотой нөхцөл байдлын улмаас Германы хэд хэдэн улстөрч тус хийн хоолой барих ажилд оролцогчдод хязгаар тавихыг уриалж байгаа аж.
Тэгвэл Германы Гадаад хэргийн сайд Хейко Маас "Nord Stream 2" төсөл заавал хэрэгжиж дуусах бөгөөд хэзээ вэ гэдэг нь цаг хугацааны асуудал хэмээн тэмдэглэсэн байна. Мөн тэрээр Вашингтоны зүгээс уг төслийн талаар үзүүлсэн шүүмжлэлийг дурдаад, "Бид өөрсдийн эрчим хүчний бодлого, хангамжийнхаа талаарх шийдвэрийг эндээс, Европоос гаргах болно. ОХУ-аас импортолдог нефтийн хэмжээ нь өнгөрсөн жил хоёр дахин нэмэгдэхэд бид Америкийг шүүмжлээгүй. АНУ эрчим хүчний бие даасан бодлогыг хэрэгжүүлэх эрхээ эдэлдэг. Бид ч бас тэгдэг" хэмээв.
"Nord Stream 2" хий дамжуулах хоолой одоогоор 93 хувийн гүйцэтгэлтэй байгаа юм.
Эх сурвалж: Риа Новости, TASS, S&P Global
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй
байж, өөрийн болоод хүний үзэл бодлыг хүндэтгэнэ үү.