Улаанбаатар хотын Захирагчийн ажлын албанаас 2016-2019 онд нийслэл хотод 71 байршилд нийт 10,091ш нарс, гацуур зэрэг шилмүүст моддыг шилжүүлэн суулгаж арчилгаа, усалгаа, бордолтын ажлыг тогтмол хийж ургалт 98-99 хувьтай байна.

Гэвч энэ сарын 19-нд гэхэд Тасганы овоо замын гол зурвас №7 дугаартай нарс модыг машин дайрч, №8 дугаартайг хазайлгаж 5ш тулаас хугалсан байна. Чингэлтэй дүүргийн замын цагдаад дуудлага өгч хэргийг газар дээр нь ирж шалган, эзэн холбогдогчыг хайхаар болжээ. 

Он гарсаар том оврын нарс модыг дайрч сүйтгэсэн 44 удаагийн тохиолдлоор нийт 18,055,222 төгрөгийн хохирол учраад байгаа бөгөөд тус албанаас тээврийн цагдаагийн албатай хамтран уйгагүй ажилласны дүнд хохирлыг дийлэнх хувийг барагдуулан нөхөн сэргээх ажлыг хохирол барагдуулсан хөрөнгөөр санхүүжүүлж байна.  

Мод нэг бүрийг 3 жил тасралтгүй арчилж усалж, хөрсний чийгшлийг хянаж, хөрсийг нь бордоотой шинэ хөрсөөр сольж, үндэсний системийг дэмжих төрөл бүрийн бордоог технологийн дагуу хэрэглэж, дусал залгаж ургуулдаг. Гэтэл нэг жолоочийн согтуугаар жолоо барьсан ухамсаргүй үйлдэл ганцхан хормын дотор тэр бүх хөдөлмөрийг устгадаг нь харамсалтай.

---