Пакистаны Ерөнхий сайд Имран Ханыг огцруулах кампанит ажлын хүрээнд сөрөг хүчний хэдэн арван мянган дэмжигчид өнгөрөгч ням гарагт Карачи хотод жагсжээ. Иргэд түүнийг 2018 оны сонгуульд цэргийн хүчний зохион байгуулалтын дагуу ялалт байгуулсан гэж үзэж байгаа юм.

Тус улсын сөрөг хүчний есөн том нам өнгөрсөн сард "Пакистаны ардчилсан хөдөлгөөн" нэрийн дор нэгдэж, Засгийн газрын эсрэг үндэсний хэмжээний эсэргүүцлийн аяныг эхлүүлсэн байна.

Сөрөг хүчний удирдагч Мариам Наваз жагсаалын үеэр Ерөнхий сайд Ханд хандан "Чи хүмүүсийн ажлыг булааж авсан. Чи ард түмнээсээ өдөрт хоёр удаа л иддэг хоолыг нь булааж авсан" хэмээн хэлжээ. Тэрээр Пакистаны гурван удаагийн Ерөнхий сайд асан Наваз Шарифын охин бөгөөд улс төрийн өв залгамжлагч нь аж.

Пакистан улсын эдийн засаг коронавирусийн цар тахлаас өмнө аль хэдийн уналтад ороод байжээ. Одоо тус улсын инфляц хоёр оронтой тоонд хүрэн, Дотоодын нийт бүтээгдэхүүн нь буурч байгаа бөгөөд Ханы эсэргүүцэгчид үүнийг түүний Засгийн газрын буруу гэж үзэж байгаа юм.

Имран Хан хоёр жилийн турш Ерөнхий сайдын албыг хашихдаа цензурийг нэмэгдүүлж, түүнийг эсэргүүцэгчид, шүүмжлэгчид болон сөрөг хүчний удирдагчдын эсрэг эрс арга хэмжээ авах болсон байна. Жагсаалд оролцсон 63 настай Факеер Балуч "Инфляцын улмаас олон ядуу иргэд үр хүүхдээ тэжээхийн тулд гуйлга гуйхад хүрсэн. Одоо энэ Засгийн газрын явах цаг нь болсон" гэж хэлсэн бөгөөд түүний эргэн тойронд иргэд "Имран яв!" хэмээн хашхирч байв.

Тус улсын дараагийн бүх нийтийн сонгууль 2023 онд товлогдоод байгаа аж.

Эх сурвалж: Reuters

 

---