Тулгар төрөө байгуулсны 2228, Ардын хувьсгалын 98 жилийн ойн Үндэсний их баяр цэнгэл наадмын хүчит бөхийн барилдаанд ес даван түрүүлж, Монгол Улсын аварга хэмээх эрхэм хүндтэй цолыг хүртсэн, Хэнтий аймгийн Өмнөдэлгэр сумын харьяат Э.Оюунболдтой холбоотой сэргээшийн асуудал Улсын дээд шүүх дээр хянагдаж байна.

Үндэсний их баяр наадмыг зохион байгуулах хороонд холбогдох хэргийн шүүх хуралдаан долдугаар сарын 21-нд Захиргааны хэргийн давж заалдах шатны шүүхэд болж, анхан шатны шийдвэрт өөрчлөлт /барилдах эрхийг хоёр жилээр хассаныг Захиргааны хэргийн давж заалдах шатны шүүх нэг жил болгож бууруулсан/ оруулсан билээ.

Хэдийгээр, Давж заалдах шатны дээр улсын аварга Э.Оюунболдын барилдах эрхийг нэг жилээр хассан хэдий ч барилдаж давсан даваа бүрийг хүчингүйд тооцох, Э.Оюунболдод өвдөг шороодсон бөхчүүдийн давааг ахиулж, цол, чимгийг олгуулах, Э.Оюунболдод олгосон Монгол Улсын аварга цолыг хураах саналыг хэвээр үлдээгээд байгаа юм.

Иймд энэхүү хэргийг Дээд шүүх хэрхэн шийдэх нь олны анхаарлын төвд байсаар байна. Хэдийгээр Улсын дээд шүүх энэхүү гомдлыг өнөөдөр хэлэлцэх ёстой байсан боловч, Э.Оюунболдын өмгөөлөгч өвчтэй шалтгаанаар түр хойшлуулжээ. Шүүх хурал хэдийд товлогдохыг жич зарлана гэж УДШ-ийн хэвлэлийн албанаас мэдээллээ.

---