Өнөөдрийн чуулганы үеэр "Хөгжлийн банк"-ны зээлийн эргэн төлөлтийн талаар яригдсан. Тус банкны захирлаар ажиллаж байсан УИХ-ын гишүүн Г.Амартүвшингээс энэ талаар тодрууллаа. 

-Миний хувьд зургаан сарын турш ажиллахад тэр их зээлийг цэгцлэх ямар ч боломжгүй байсан. Гэхдээ дотоод дүрэм журам, зээлийн гаралтыг улс төрөөс арай ангид болгосон гэж бодож байгаа. Энэ ажлыг Сангийн яам үргэлжлүүлэн хийж байгаа. “Эрэл”-ийн зээл гэх мэт том, том зээлүүд намайг захирал болохоос өмнө нь гарсан зээлүүд. Үүн дээр улс төрийн нөлөө орсон байх гэж бодож байна.

-"Хөгжлийн банк"-ны хувьд Сангийн яамны харьяанд ирэхээр үйл ажиллагаа нь сайжрах юм уу?

-"Хөгжлийн банк"-ны хувьд хоёр төсөвтэй явдаг байсан. Энэ замбараагүй байдал цэгцлэгдсэн гэж хэлж болно. Ковидийн үед "Хөгжлийн банк" аж ахуйн нэгжүүддээ зээл олгож, санхүүжилт хийх ёстой баймаар байна. Гэвч нийт зээлийн багцын 40 хувь нь муу ангилалтай байсан. Тэгэхээр эдгээр зээлийг төлүүлэхийн тулд шүүхийн шугамаар шийдэж, зээлдэгч нартайгаа шинэ графикаар тохирж зээлээ төлүүлэх хэрэгтэй байх. Авсан зээл төлөгдөж байж, шинээр зээл олгох боломжтой шүү дээ. 

---