Бразилийн Авлигатай тэмцэх газрын ажилтнууд сенатч Чико Родригесийн гэрт нэгжлэг хийж байх үеэрээ түүнийг дотуур өмдөндөө бэлэн мөнгө нууж байсныг илрүүлэн, баривчилжээ.

Цагдаа нар тус улсын Засгийн газрын удирдлагууд коронавирусийн хариу арга хэмжээний санхүүжилтийг зүй бусаар ашигласан хэргийг шалгах ажлын хүрээнд Родригесийн гэрийг нэгжиж байсан аж. Тэд эхлээд түүний сейф дотроос 7,700 гаруй ам.доллартой тэнцэх бэлэн мөнгө олсон байна.

Үүний дараахан Родригес ариун цэврийн өрөө орохыг хүссэн бөгөөд нэгэн цагдаагийн албан тушаалтан сенатчийн өмдөн дотроос тэгш өнцөгт хэлбэртэй, том зүйл товойж байгааг анзаарсан гэнэ. "Түүний дотуур өмднөөс 2,500 ам.доллар бүхий мөнгөний боодлууд олдсон" гэж цагдаагийн тайланд бичжээ.

Ингээд албаныхан түүнээс дотуур өмдөндөө дахиад мөнгө нуусан эсэхийг нь гурван удаа давтан асуухад Родригес ууртайгаар дотуур өмдөндөө гараа шургуулаад, нийт 3,200 гаруй ам.долларын мөнгөн дэвсгэртийг гаргаж ирсэн байна.

Ерөнхийлөгч Жаир Болсонарогийн ойрын холбоотон тэрээр бүх гэм буруугаа үгүйсгэж байгаа хэдий ч дээд шүүхээс түүнийг албан тушаалаас нь түр түдгэлзүүлээд байгаа аж. Харин Родригес өөрийн мэдэгдэлдээ "Ковид-19-тэй тэмцэх төсөв мөнгийг олж аван, хууль тогтоогчийнхоо хувьд ажлаа хийж гүйцэтгэсний минь төлөө миний гэрт халдлаа. Би шударга ёсонд итгэдэг бөгөөд өөрийгөө ямар ч хууль бус үйлдэлтэй холбоогүй гэдгээ нотлох болно" хэмээн тэмдэглэсэн байна.

Эх сурвалж: Reuters, Sky News

---