Ирэх долоо хоногт ОХУ-аас Монголд ирэх хүсэлт гаргасан иргэдийг татан авах тухай ГХЯ-ны Консулын газрын захирал Л.Мөнхтүшиг өнөөдрийн хэвлэлийн хурлын үеэр хэллээ.

Тэрбээр “Өнгөрсөн хугацаанд бид нийт 91 удаагийн нислэгээр 18,021 иргэнийг эх оронд нь авчирчээ.

Яг өнөөдрийн байдлаар агаар болон авто замаар нийт 22,566 иргэн эх орондоо ирээд байна.

Бид ойрын хугацаанд буюу ирэх долоо хоногт ОХУ-аас нутаг буцах хүсэлтэй манай улсын иргэд болон манай улсад хөдөлмөр эрхэлдэг, байнга оршин суудаг ОХУ-ын иргэд гээд нийт 80 гаруй хүнийг Алтанбулагийн боомтоор нэвтрүүлэхээр бэлтгэл ажлыг хангаж байна. Товыг ойрын хугацаанд тодорхой болохоор нь нийтэд зарлах болно.

Түүнчлэн БНХАУ руу нутаг буцах хүсэлтэй манай улсын иргэд болон манай улсад хөдөлмөр эрхэлдэг, байнга оршин суудаг 50 иргэнийг ӨвөрМонголын талаас хүлээн авах зөвшөөрлийг өгсөн.

Ингээд Эрээн хотын удирдлагуудтай хэзээ хилээр нэвтрүүлэх талаар ярилцана. Түүнчлэн хятадын талаас эдгээр иргэдийн коронавирусийн шинжилгээ өгсөн байхыг шаардаж байгаа тул ХӨСҮТ-тэй шинжилгээ өгүүлэх тал дээр ярьж байна. 

Энэ сарын 16-нд буюу өнөөдөр Сөүл-Улаанбаатарын чиглэлийн транзит тусгай үүргийн онгоцоор АНУ, Мексик, Бразил, Зүүн өмнөд Азийн 14 улсаас яаралтай буцах хүсэлтэй 250 иргэн эх орондоо ирж байгаа юм. 

ЦААШИД ХИЙГДЭХ НИСЛЭГҮҮД

• Аравдугаар сарын 17-нд Сөүл-Улаанбаатар
• Аравдугаар сарын 18-нд Сөүл-Улаанбаатар 
• Аравдугаар сарын 19-нд Сөүл-Улаанбаатар 
• Аравдугаар сарын 20-нд Сөүл-Улаанбаатар 
• Аравдугаар сарын 23-нд Франкфурт-Улаанбаатар чиглэлд тус, тус нислэг үйлдэх бол Сиатл-Улаанбаатар чиглэлийн нислэгийн хугацаа тодорхойгүй байна.

---