АНУ-ын Чикаго хотын Лойола их сургуулийн Хууль зүйн сургуулийг саяхан төгссөн Брианна Хилл хуульчийн мэргэжлийн шалгалт өгч байх үеэрээ амаржжээ.

Тэрээр өөрийгөө шалгалтын үеэр жирэмсэн байна гэдгээ мэдэж байсан ч хэдий ч коронавирусийн цар тахлын улмаас түүнд том асуудал тулгарсан байна. Хилл энэ талаар "Би хуульчийн мэргэжлийн шалгалтаа өгөхдөө 28 долоо хоногтой жирэмсэн байна гэж бодож байсан ч цар тахлын улмаас шалгалт аравдугаар сар хүртэл хойшилж, би 38 долоо хоногтой жирэмсэн үедээ тест бөглөх хэрэгтэй болсон. Би эмнэлгийнхээ орноос шалгалт өгнө гэж хошигнож байлаа. Энэ том сургамж боллоо!" хэмээн ярьжээ.

Ковид-19-ийн улмаас алсын зайнаас зохион байгуулагдаж буй энэхүү шалгалт 90 минутын дөрвөн хэсэгтэй бөгөөд хоёр өдөрт хуваагдсан байдаг байна. Мөн ямар нэгэн арга мэх хэрэглээгүй гэдгээ батлахын тулд шалгалтын турш дэлгэцийнхээ өмнөөс огт хөдөлж болохгүй аж.

"Шалгалт эхлээд 30 минутын дараа би ямар нэг зүйл мэдэрсэн. Ус гарчхаагүй байгаасай л гэж найдаж байлаа. Гэхдээ би явж шалгах боломжгүй байсан тул шалгалтын эхний хэсгээ дуусгасан. Шалгалтаа дуусмагц босож зогсоод ус минь гарсан болохыг мэдсэн" гэж Хилл "CNN"-д агентлагт ярьжээ.

Гэхдээ энэ нь түүнийг зорилгоо биелүүлэхэд саад болоогүй гэнэ. Тэрээр "Би завсарлагаа авахдаа өөрийгөө цэвэрлээд, нөхөр, эх баригч, ээж рүүгээ залгаад, сандарсандаа жаахан уйлсан. Гэхдээ эх баригч маань надад эмнэлэг явах хүртэл хугацаа байна гэж хэлсэн тул би шалгалтынхаа хоёр дахь хэсгийг бөглөхөөр суусан" гэсэн юм.

Хилл 17:30 цагт эмнэлэгт ирэн, 22:00 цагийн үед амаржин, хүүтэй болжээ. Гэвч тэрээр шалгалтаа дуусгахыг үнэхээр их хүсэж байсан бөгөөд түүний гэр бүл, эмнэлгийн ажилчид түүнийг дэмжсэн байна. Тиймээс маргааш нь эмнэлгийн ажилтнууд түүнд хоосон өрөө гаргаж өгөөд, хаалган дээр нь "Бүү саад бол" гэсэн тэмдэг тавьж өгсөн гэнэ. Ингээд Хилл үлдсэн шалгалтаа өгсөн бөгөөд харин завсарлагааны цагаараа хүүхдээ хөхүүлээд амжсан байна.

Шинэхэн ээж Брианна Хиллын хуульчийн мэргэжлийн шалгалтын хариу ирэх арванхоёрдугаар сард гарах аж.

Эх сурвалж: CNN

---