Жил бүрийн томуу, томуу төст өвчний тархалтын ид идэвхжил, тархалтын үед эрүүл мэндийн байгууллагууд ачаалал өндөртэй ажилладаг. ЭМЯ-аас ирэх сардаа багтаан томуугийн түргэвчилсэн оношлуурыг дүүрэг, өрхийн эмнэлгүүдэд тарааж, томуугийн ид дэгдэлтийн үед ашиглахаар болсон.

Тэгвэл өрхийн эмнэлгүүдэд томуугийн А, В хүрээний вирусийн хурдавчилсан аргаар тодорхойлж эхэлжээ. Оношлуурын мэдрэг чанар 94-95 орчим хувь буюу зөв оношлох боломжтой учраас ХӨСҮТ-ийн Вирус судлалын лаборатори уг оношлуурыг ашиглах эмч, сувилагч нарт хэрэглээний талаар арга зүйн сургалт явуулж, удирдамжаар хангасан байна. Харин оношлуурын үр дүнд тулгуурлан оношлох, эмчлэх сургалтыг ЭХЭМҮТ-ээс нэгдсэн байдлаар зохион байгуулжээ.

ХӨСҮТ-ийн ерөнхий захирал Д.Нямхүү “Энэ жилийн хувьд ЭМЯ–аас ТТӨ-с сэргийлэх, бэлэн байдлыг хангах чиглэлд маш их анхаарч байгаа бөгөөд өмнөх жилүүдэд 159 мянган тун томуугийн вакцин оруулж ирэн хүүхэд, эрсдэлт бүлгийг хамруулдаг байсан бол энэ жил 3 дахин нэмэгдсэн. Томуугийн вакцинд хамрагдалт сайн явагдаж байна.

Томуугийн түргэвчилсэн оношлуурыг өрхийн болон дүүргийн нэгдсэн эмнэлгүүдэд ашиглаад эхэлбэл бид Томуу тархан тархалт болохоос сэргийлэх, тухайн хүүхдэд вирусийн эсрэг эмчилгээ явуулахад ач холбогдолтой.

ХӨСҮТ-ийн Вирус судлалын лабораторийн баг Томуугийн А, В хүрээг оношлох түргэвчилсэн оношлуурыг хэрхэн ашиглах, хамар залгиурын арчдас авахаас үр дүнг дүгнэх хүртэлх ажиллагааг нарийвчлан зааж өгч байгаа” гэлээ.

ЭХЭМҮТ-ийн ерөнхий захирал Ш.Энхтөр “Бид амьсгалын замын эмгэгтэй хүүхдэд энэ оношлуурыг ашиглах нь ядаж нян, вирусээ ялган оношлоод эмчилгээг зөв хийхэд асар ач холбогдолтой. Энэ нь цаашлаад антибиотикийн зөв зохистой хэрэглээ, үйлчлүүлэгчийн аюулгүй байдал, эмчилгээний чанартай ч уялдана.  ЭХЭМҮТ-өөс Амьсгалын замын эмгэгийн эмчилгээ, оношлогооны удирдамжийг шинэчлэн, хэрэглээг бүр тодорхой оруулан ТТӨ, Ковид -19, амьсгалын замын эмгэг хүндрэлийн гэсэн гурван бүлгээр боловсруулан хэвлэлтэд өгсөн. Харин хөдөө аймгуудад өөрсдөө очиж сургалтаа хийнэ” гэлээ.

---