Сонгинохайрхан дүүргийн ИТХ-ын 43 тойргийн иргэд сонгогч нарыг МАН-аас автомашинаар зөөж, санал авах байранд авчирч байна гэх мэдээллийн дагуу газар дээр нь сурвалжиллаа.

Ингээд тус дүүрэгт байрлах "Чандмань" гэх дэлгүүрээс Starex 33-04 УБЯ гэх дугаартай автомашин гурван иргэнийг суулган санал авах 81 дүгээр сургуулийн гадаа буулган санал авах байр руу орсон юм.

Тээврийн цагдаагийн газрын алба хаагчид тус автомашины жолоочийн бичиг баримтыг шалгахад зөрчилтэй байсан тул хурааж авчээ. Starex 33-04 УБЯ автомашины жолооч “Өглөөнөөс хойш явсан. Түрээсээр ажиллаж байгаа. Хэдэн төгрөг өгнө гэсэн гэсэн зүйл хэлээгүй” гэсэн юм.

Харин СХД-ийн ИТХ-ын 43 дугаар тойрогт АН-аас ажиглагчаар ажиллаж байгаа З.Эрдэнэжаргал “Санал авах байраас хол иргэдийг автомашинаар зөөх асуудал гарч байна. 43 дугаар тойргийн хувьд 81 дүгээр сургууль, 107 дугаар цэцэрлэгт санал хураалт авч байгаа. Миний хувьд 107 дугаар цэцэрлэгт саналаа өгөхөд саналын хуудасны хавтас өгөөгүй. Хавтас өгнө үү гэж нэхэх үед өгсөн. Иргэдэд саналын хуудасны хавтас өгөхгүй байгаа нь хэнд саналаа өгч байгааг харах боломжийг олгож байгаа хэрэг. Иргэдийн саналын хуудсыг маш ихээр харж танаж, тэмдэглэж авч байгаа зөрчил илэрч байна” гэсэн юм.

---