Сонгуулийн шударга бус байдлаас сэргийлэх зорилгоор Ардчилсан нам, хууль бус сонгуулийн үйлдлийн мэдээг иргэдээс худалдаж авах 100 сая төгрөгийн сан байгуулж буйгаа мэдэгдлээ.

Ардчилсан намын ХЭГ-ын дарга, АН-ын Үндэсний бодлогын хорооны гишүүн П.Нүрзэд:

-Сүүлийн үед сонгуулийн хуулийг зөрчсөн үйлдлүүд гарлаа. Харамсалтай нь СЕХ, нийслэлийн Сонгуулийн хороо, хуулийн хэрэгжилтийг хангах, хамаарал бүхий байгууллагууд эх баригчдад үйлчилж байна. Сонгуулийн өдрүүдэд сонгогчдын саналыг хууль бусаар худалдаж авах оролдлого, хаягийн зөрчилтэй иргэнээс санал өгүүлэхийг завдах,  нэг хаяг дээр үндэслэлгүй олон хүн байх, нас барсан болон гадаадад ажиллаж амьдарч байгаа иргэний өмнөөс санал өгөх зэрэг асуудлыг сонгогч та бүхэн хянахгүй бол хууль дүрэм сахиулах газрууд нь ажлаа хийхгүй байна.

Иймд Ардчилсан намаас санал хураалтад нөлөөлөх, сонгогч нарт нөлөөлөх гэж оролдож байгаа бодитой мэдээллийг хоёр дахин үнээр худалдаж авах 100 сая төгрөгийн сан байгуулж байна.

Иргэн та 98061206, 321204 гэсэн дугаар луу холбогдон баримт нотолгоотой, эх сурвалжтай мэдээллийг мэдээлж болно. Таныг болон эх сурвалжийг нууцлах болно” гэлээ.

---