Сангийн сайд Ч.Хүрэлбаатар цаг үеийн зарим асуудлаар мэдээлэл өгч байна. Тэрбээр "Монгол Улсыг саарал жагсаалтаас гаргах хяналтын бүлгийн хуралдаанаар эсэргүүцсэн орон гараагүй. АНУ-ын Сангийн яам Монгол Улсыг саарал жагсаалтаас гаргах саналаа илэрхийлсэн. Үүний дараа Английн Сангийн яам мөн ийм санал илэрхийлсэн. БНХАУ-ын Ардын банк, Евро Азийн мөнгө угаах терроризмын эсрэг зөвлөл мөн ийм саналтай байна гэдгээ илэрхийлсэн. Үүний дараа эсэргүүцэж байгаа санал байгаа эсэхийг лавлахад эсэргүүцэж байгаа улс гараагүй.

Цахим хуралд оролцсон 100 гаруй орон 100 хувийн саналаар дэмжсэн гэсэн үг. Аравдугаар сарын 21-23-ны өдөр болох нэгдсэн хуралдаанаар баталгаажна.

Урьдчилсан дүн өөрчлөгдөх боломж байхгүй. Монголоос аж ахуйн нэгжүүд гадаад руу гүйлгээ хийхэд Монголоос орж ирсэн гүйлгээг “Саарал жагсаалтад” байгаа тул хянадаг. Энэ сарын 23-ны ФАТФ нэгдсэн хуралдаанаар шийдвэр гарснаар албан ёсоор манай улсыг саарал жагсаалтаас хаснаар гүйлгээ хянадаг асуудал буурна.

2021 оны төсвийн төслийг хэлэлцэн батлах хугацаа хойшилж байна. Дөрвөн шатны хэлэлцүүлгийг дамжин батлах ёстой төсвийн төслийг хэлэлцэх хуулийн хугацаа долоо хүрэхгүй хоног үлдээд байна. Энэ талаар Сангийн сайд Ч.Хүрэлбаатар "Надад ирсэн хуваарийн дагуу аравдугаар сарын 16-наас эхлэн төсвийн төслийг хэлэлцэж эхэлнэ. Бид төсвийг долоо хоногийн хугацаанд хэлэлцээд баталсан удаа бий. Энэ удаад ч хэлэлцэн баталж амжина. Гишүүд төсвийн төслийг гар дээрээ авсан. Орон нутагт ажиллаж байгаа хэдий ч танилцаад явж байгаа болов уу гэж ойлгож байна. Энэ нь улам илүү хэлэлцүүлэгтээ тусгах байх гэж бодож байна" гэлээ.

---