Сонгуулийн ерөнхий хорооноос орон нутгийн сонгуулийн санал авах ажиллагааны талаар танилцуулж байна.
Аймаг, нийслэл, сум дүүргийн ИТХ-ын сонгуулийн сонгогчийн санал авах ажиллагаа 10-р сарын 15-ны өглөө 07:00 цагт эхэлж, 20:00 цагт дуусна.

Бүх шатны сонгуулийн хороод бэлтгэл ажлаа хангаж дуусчээ. Сонгуулийг зохион байгуулах ажилд нь 21176 төрийн албан хаагч ажиллаж байна. Аймаг, нийслэлийн ИТХ-ын сонгуульд 9 нам, нэг эвсэл, бие даагч, сум дүүргийн ИТХ-д 9 нам болон бие даагч нийт 17149 нэр дэвшигч өрсөлдөж байна.

Орон нутгийн сонгуулийн дүнд 21 аймаг, нийслэлээс 816, 330 сум, 9 дүүргээс 7353 төлөөлөгч сонгогдоно. Өнөөдрөөс өндөр настан, хөгжлийн бэрхшээлтэй иргэдээс битүүмжилсэн хайрцгаар санал авч эхэлжээ.

Ер нь нийт 2 сая 147 мянган иргэн саналаа өгнө. Сонгуулийн саналыг 2148 санал авах байранд авах бөгөөд Ковид-19-ийн халдвараас сэргийлэн ариутгал, халдваргүйжүүлэлтийг хийжээ.

Орон нутгийн сонгуультай холбоотой 207 гомдол иржээ 

ЦЕГ-ын Нийгмийн хэв журам, ОНАБА-ны Зөрчил шалгах, мэргэжил арга зүйн хэлтсийн дарга, цагдаагийн хурандаа Ч.Чинбат "Орон нутгийн сонгуультай холбоотой эхний гомдол 9 сарын 21-ний өдөр бүртгэгдсэн бөгөөд өнөөдрийн байдлаар 207 гомдол ирээд байна. Гомдол мэдээллийг ангилж үзвэл улс төрийн эрх чөлөөний эсрэг гэмт хэрэг 16, хуурамч бичиг баримт үйлдэх 2, нэр төрд халдах 62, хуульд зааснаас өөр хэлбэрээр сурталчилгаа явуулах 81, бараа эд зүйл хөнгөлөлттэй үнээр зарсан, дайллага хийх, ажилд оруулах, амлалт өгсөн гэх гомдол 23, чансаа тогтоох санал асуулгатай холбоотой 23, сонгуулийн мөрийн хөтөлбөрт тусгаагүй зүйлийг сурталчилгаандаа ашигласан гэх 7, бусад 9 гомдол ирсэн. Зөрчлийн 191 гомдлоос таван мэдээлэлд хэрэг бүртгэлтийн хэрэг үүсгэсэн" гэлээ.  

Орон нутгийн сонгуулийн нийт зардал 16.5 тэрбум төгрөгт багтах бөгөөд цар тахалтай холбоотойгоор халдваргүйжилт, ариутгалтай холбоотой 483 сая төгрөгийн зардал гаргах шийдвэр гарсан. Ингэхдээ нэг удаагийн бээлий болон халдваргүйжүүлэлтийн бодисыг онцгой байдлын газар санал авах хэсгийн хороодод хүргүүлээд байна. Санал тоолох машинтай холбоотой мэдээллийг цагдаа болон тагнуулын байгууллага хамтран шалгаж байна. 

---