Монгол Улсад Нийтийн аж ахуйн салбар үүсэж хөгжсөний 89 жилийн ойг тохиолдуулан “ Орон сууц, нийтийн аж ахуйн үйлчилгээний ажилтны өдөр” нээлттэй хаалганы өдөрлөгийг өнөөдөр Сүхбаатарын талбайд зохион байгууллаа. Өдөрлөгийг “ Хэрэглэгчээ дээдэлье” уриа нь доор орон даяар тэмдэглэн өнгөрүүлсэн байна.

Орон сууц, нийтийн аж ахуйн үйлчилгээний ажилтны өдөрлөгийн арга хэмжээг ус хангамж, ариутгах татуургын ашиглалт, үйлчилгээг эрхэлж буй тусгай зөвшөөрөл эзэмшигч байгууллагуудын үйл ажиллагааг хэрэглэгчдэд таниулах зорилгоор зохион байгуулж байна.

Манай орны нийт ус ашиглалт, усны хэрэглээ жилд 500 сая шоо метр байна. Нийт хүн амын 30.5 хувь нь төвлөрсөн ус түгээгүүрийн сүлжээнээс, 35.8 хувь нь зөөврийн ус тээврийн үйлчилгээнээс, 24.6 хувь нь ус түгээх байр, худгаас, 9.1 хувь нь булаг, шанд, гол горхиноос усаа авч хэрэглэж байна.

Усны хэрэглээний түвшин нь харилцан адилгүй бөгөөд орон сууцанд оршин суугчид хоногт дунджаар 230-350 л, хөдөө орон нутаг болон гэр хороололд оршин суугчид дунджаар 5-10 л ус хэрэглэдэг. Ус ашиглалтын хэмжээ жилээс жилд өсөн нэмэгдэх хандлагатай байгаа юм.

Орон сууц, нийтийн аж ахуйн үйлчилгээний ажилтны өдөр нээлттэй өдөрлөгийг аймаг, сумын төвд мөн адил зохион байгуулсан байна.

---