Гадаад харилцааны сайд Н.Энхтайваны урилгаар Япон улсын Гадаад хэргийн сайд Мотэги Тошимицү энэ сарын 9-10-ны өдрүүдэд Монгол Улсад албан ёсны айлчлал хийх гэж байгаа билээ.

Энэ үеэр Япон улсаас 230 сая ам.долларын нэн хөнгөлөлттэй буюу 0.01 хувийн хүүтэй зээлийн хэлэлцээрт гарын үсэг зурах юм байна. Уг зээлийн хэлэлцээрийн талаарх асуудлыг өнөөдөр Төсөв, Эдийн засаг, Аюулгүй байдал, гадаад бодлогын байнгын хороодоор хэлэлцэхээр болсныг УИХ-ын дарга Г.Занданшатар чуулганы хуралдааны үеэр танилцуулсан.

Ингээд Эдийн засгийн байнгын хорооны дарга УИХ-ын гишүүн Ж.Ганбаатараас уг зээлийн талаар тодруулсан юм.

-Төсвийн алдагдлыг 4.8 их наяд төгрөгийг нөхөх зориулалтаар Япон улсаас буцалтгүй зээл авахаар болсон. Илүү дэлгэрэнгүй асуудлыг Аюулгүй байдлын байнгын хороон дээр яригдаж, чуулганаар орж хэлэлцэгдэнэ. Уул нь энэ асуудлыг Эдийн засгийн байнгын хороон дээр түлхүү ярих ёстой гэж үздэг. Гэвч санал дүгнэлтээ Аюулгүй байдлын байнгын хороонд хүргүүлдэг дэгтэй.

Авч байгаа зээлийн хувьд 0.01 хувьтай, урт хугацаатай 10 жилийн дараагаас үндсэн зээлийг эргэн төлж эхэлнэ. Энэ бол Монгол Улсын хувьд боломжийн зээл гэж үзэж байгаа. Нэгэнт төсвийн алдагдлыг баталсан учраас нэг зүйлээр нөхөх шаардлагатай учраас боломжийн зээлээр нөхөж байна гэж харж байгаа.

-Таны зөвлөх М.Энхмэнд ТББ-аараа дамжуулж УИХ-ын Тамгын газраас 76 сая төгрөг авсан уу?

-М.Энхмэндээс өөрөөс нь асуухад дөрвөн сая төгрөгийн хуулийн зөвлөгөө өгсөн, хөлсөө авсан гэсэн. Тэрнээс бол 76 сая төгрөг бол худлаа. ТББ нь юу хийдгийг мэдэхгүй байна.

---