Беларусийн сөрөг хүчний удирдагч, Ерөнхийлөгчийн сонгуульд нэр дэвшигч асан Светлана Тихановскаяг ОХУ-ын нутаг дэвсгэр дээр баривчлах захирамж, тушаал гарсан болохыг Оросын Дотоод хэргийн яамнаас мэдээлжээ. Тус яамны мэдээллийн санд "Захирамжийн үндэслэл: Эрүүгийн хуулийн зүйл анги" хэмээн тэмдэглэсэн байна.

Харин Оросын хууль сахиулах байгууллагын нэгэн эх сурвалжийн мэдээлснээр энэхүү баривчлах тушаал анх Беларуст гарсан боловч хоёр улсын хоорондын тохиролцооны улмаас ОХУ-ын газар нутагт ч мөн хамаарах болсон аж. Ийм төрлийн улс хоорондын баривчлах тогтоолыг олон улсын хэмжээнийх гэж авч үздэггүй гэдгийг эх сурвалж тайлбарласан юм.

Беларусь улсад наймдугаар сарын 9-ний өдөр болсон Ерөнхийлөгчийн сонгуулийн дараа үндэсний хэмжээний эсэргүүцлийн жагсаал, цуглааныг дэгдсэн. Тус улсын Сонгуулийн төв комиссын албан ёсны дүнгээс үзвэл одоогийн Ерөнхийлөгч Александр Лукашенко 80.10 хувийн санал авч, илт ялалт байгуулсан бол түүний хамгийн том өрсөлдөгч Светлана Тихановская 10.12 хувийн санал цуглуулж, хоёрдугаарт бичигдсэн юм.

Гэвч Тихановская сонгуулийн үр дүнг хүлээн зөвшөөрөхөөс татгалзан, Беларусийг орхин, Литва улсад очоод байгаа билээ.

Эх сурвалж: TASS

---