Энэ сарын 5-ны өдрийн 16 цаг 45 минутын үед яармагийн замын явган хүний гарцаар зам хөндлөн гарч байсан бага насны хоёр хүүхэд машинд дайруулж, таван настай хүүхэд амиа алдсан хэрэг гарсан. Гэтэл уг явдал болоод удалгүй өнөө өглөө дахин нэг хүүхэд тус замаар зам хөндлөн гарч яваад машинд дайруулсан байна.

Яармагийн энэ хавьд маш олон сургууль, цэцэрлэг байдаг учраас хүүхдүүд хэдэн арваараа энэ гарцаар гардаг байна. Гэвч энэ гарц ямар ч гэрлэн дохио, хурд сааруулагч байхгүй нь хүүхдүүд осолд өртөх, амь насаа алдах гол шалтгаан болж байна гэж иргэд үзэж байна.

Яармагийн энэ замтай ижил явган хүний гарц нь тэмдэг тэмдэглэгээгүй, гэрлэн дохиогүй гээд стандартын шаардлага хангаагүй маш олон зам Улаанбаатар хотод байдаг. Зарим замд бүр явган хүний ч гарц байдаггүй. Үүнээс болж явган зорчигчид амь насаа алдсаар байна.

2019 онд л гэхэд  49 хүүхэд зам тээврийн ослын улмаас амь насаа алдсан харамсалтай тоо үзүүлэлт байна. Харин 2020 оны 10 сарын байдлаар зам тээврийн ослын улмаас амиа алдсан хүүхдийн тоо 53 болж өсжээ. Үүний дотор 21 хүүхэд эцэг эх асран хамгаалагчийн анхаарал болгоомжгүй байдлаас үүдэж машинд дайруулж амь насаа алдсан байна.

Тиймээс холбогдох газрууд явган хүний гарцын асуудалд анхаарал хандуулж, эцэг эхчүүд бага насны хүүхдээ харгалзах хүнгүйгээр замын хөдөлгөөнд оролцуулахгүй байхад анхаарах шаардлага байна.  Мөн жолооч нар явган хүний гарц руу ойртон ирэхдээ хурдаа хасаж, гарцаар гарч буй явган зорчигчид зам тавьж өгөхийг холбогдох байгууллагууд анхааруулж байна.

---