Засгийн газрыг огцруулах эсэх асуудлыг парламент хэзээ хэлэлцэх нь тодорхойгүй байна. Дэгийн тухай хуульд зааснаар Төрийн байгуулалтын байнгын хороогоор эхлээд хэлэлцэх ёстой. Байнгын хорооны дараа нэгдсэн чуулганаар хэлэлцэж, эцсийн шийдвэрийг гаргах хуультай. Дэгийн тухай хуулийн 38.2-д УИХ-ын нэгдсэн хуралдаанаар Байнгын хорооны санал, дүгнэлт гарснаас хойш долоо хоногийн дотор хуралдаж, Байнгын хорооны дүгнэлтийг сонсож илээр санал хураалт явуулж УИХ-ын гишүүдийн олонх дэмжсэн бол огцруулах тухай тогтоол батлагдсанд тооцно” гэжээ.

Энэ 7 хоногтоо багтаан Төрийн байгуулалтын байнгын хороогоор асуудлыг авч хэлэлцэх ёстой

УИХ-ын гишүүн Д.Хаянхярваа тэргүүтэй 27 гишүүн Ерөнхий сайд У.Хүрэлсүхийг огцруулах бичгийг УИХ-ын даргад өчигдөр буюу 2018-11-19 ны өдөр өргөн барьсан. Гэвч өнөөдөр төрийн ордон нам жим байна.

УИХ дахь АН-ын бүлгийн дарга Д.Эрдэнэбат сэтгүүлчдэд ярилцлага өгөх үеэрээ “УИХ ч тэр Засгийн газар ч тэр хариуцлагатай л байх ёстой. Цаашдаа байнгын хороод нь ч хуралдаж чадах эсэх нь эргэлзээтэй байна” гэж ярьжээ.

Одоогоор УИХ-ын даргын дэргэдэх зөвлөл хуралдаж энэ 7 хоногт парламентээр хэлэлцэх асуудлын дараалалд өөрчлөлт оруулаагүй байна. Ямартаа ч энэ 7 хоногийн баасан гарагт Төрийн байгуулалтын байнгын хороог хуралдуулж магадгүй гэж албаны эх сурвалж хэллээ.

---