“Хурд” хамтлагийнхан 25 жилийн ойгоо үзэгчидтэйгээ хамт тэмдэглэж “Нар” тоглолтоо өнгөрсөн сард толилуулсан. Тэднээс илүү фенүүд нь энэ баярыг ихэд сэтгэл догдлон хүлээж авсан юм. Хүсэл мөрөөдөл, зорилго тэмүүллээрээ жигүүр хийж, уйгагүй хөдөлмөрлөсөн хичээл зүтгэл, уран бүтээл нь тэднийг рок попын түүхэнд арилахааргүй тод мөр үлдээж чадав. Хүн цөөтэй, нам гүмхэн жижиг гацаанд аав, ээжийнхээ хамт амьдарч завтай үедээ гитар балбаж, бөмбөр нүдсэн жаалуудыг хожим Монголын алдарт рок хамтлаг болно гэж хэн ч төсөөлөөгүй биз.

 

Шүүмжлэлд ч багагүй өртөж, урлагийнханд тохиолддог бартаат замыг бүгдээрээ нэг хүн шиг туулж өнөөгийн өндөрлөгт хүрлээ 

“Хурд”, “Чоно” гэсэн ах, дүүсийн рок хамтлаг байгуулагдана гэж мөн л хэний ч санаанд төсөөлөгдөөгүй нь лавтай. Хөвгүүд л болсон хойно ноцолдож, өртөөний умгар байшингаа нураачих дөхдөг байсан ч их хүмүүжилтэй өссөн гэдэг. Том ах Д.Ганбаяр нь дүү нарынхаа  хувьд бол ааваасаа дутахгүй “ерөнхийлөгч” л гэсэн үг. Тэд урлагийн замыг тэгш шулуунаар туулсан уу гэвэл үгүй. Монголын рок попын ертөнцөд орж ирсэн ч тэр цагийн хүмүүс урт үстэй, уранхай жинстэй, ковбой гутал өмссөн, эрээн алчуур эв хавгүйхэн боосон, тэгээд бүр тайзан дээр хэний ч өмнө нь харж байгаагүй үйлдэл гаргаж, дураараа дургиж, дунд чөмгөөрөө жиргэн, нааш цааш гүйлдэн, хачин этгээд үг хэллэгээр задгай дуулдаг залуусыг хүлээж авахад сэтгэлзүй нь хараахан бэлэн биш байв. Гэвч тэд өөрсдийгөө хүлээн зөвшөөрүүлэхийн тулд маш ихээр хөдөлмөрлөсөн. 

 

 

Хачин үг хэллэгээр задгай дуулдаг залуусыг хүлээж авахад хүмүүсийн сэтгэлзүй хараахан бэлэн биш байв 

Шүүмжлэлд ч багагүй өртөж, урлагийнханд тохиолддог саад бэрхшээл, бартаат замыг бүгдээрээ нэг хүн шиг туулж өнөөгийн өндөрлөгт хүрлээ. Дамба гуайн хүүхдүүд шиг ингэж олонд танигдсан хамтлаг өнөөг хүртэл алга. Ах дүүс авьяасаараа гагнагдаж, ард түмэндээ танигдан, шүтэн бишрэгчдийнхээ хүрээг тэлж 25 турш “өөрсдийн ноёрхлоо” тогтоов. Тэдний дундаас хамтлагийн гишүүн Д.Отгонбаяр яруу найраг сонирхож, шүлгийн ном их уншдаг. Яруу найраг сонсох дуртай. Болор цом  наадмыг жил бүр үздэг байнгын үзэгч. Тэрбээр өдгөө гавьяат жүжигчин цол хүртсэн нэртэй, алдартай, олны танил. Гэхдээ биеэ тоож байгаагүй, янз бүрийн хэл аманд ч өртөж яваагүй.

 

 

Түүнд рок, попынхон нэгэн бэлэг барьсан нь тун өвөрмөц. Тэр нь үнэтэй автомашин, ганган дуугаралттай гитар ч биш  

Ах дүүсийн сэтгэлийн жигүүр, хурдаас төрсөн хамтлагийг чимдэг олон зүйл нь их энгийн.  Д.Төмөрцогийн ган төмөр шиг цуцашгүй хоолой, Д.Отгонбаярын соль гитарын ер бусын аялгуу, хэмнэл уяруулдаг бол Д.Отгонбаатарын бөмбөрийн төвөргөөн эрч хүч хайрлаж, Д.Ганбаярын ухаан, менежмент “Хурд”-ыг урагшлуулах түүчээ болсоор ирсэн. Хамтлагийн гитарчин Д.Отгонбаяр 1973 оны 12-р сарын 28-нд төрсөн. Гуравдугаар ангиасаа хүүхдийн “Ган зам” хамтлагт бөмбөр, гитар тоглосон түүний шүтдэг хамтлаг нь “Guns N’ Roses”, “Металлика”. Тэрбээр энэ сарын 23, 24-нд “Чи минь байгаа болохоор” тоглолтоо өөрийн зохиосон, хит дуугаараа нэрлэж, фэнүүдтэйгээ уулзах нь ээ. 

 

 

“Аяганы хариу өдөртөө, агтны хариу жилдээ” гэдэг үгийн хариуг дүү Д.Дорждэрэм нь харуулав

Түүнд зориулж рок, попынхон нэгэн бэлэг барьсан нь тун өвөрмөц. Тэр нь үнэтэй автомашин, ганган дуугаралттай гитар ч биш, харин  "Брэнд медиа" групп, “Асе энтертайнмент”-аас санаачлан тун удахгүй толилуулах тоглолтод нь зориулж үе үеийн гитарчин, бөмбөрчин, уран бүтээлчид нэгдэн дүү Д.Дорждэрэмийнх нь дуулсан "Чамд таалагдахын тулд" дууг шинэчлэн дуулжээ. Энэ сюрпризыг барих гэж уран бүтээлчид бүтэн сар бэлдсэн гэдэг. Энэ дуугаар ийн бэлэг барьсны учир нь Д.Отгонбаяр 2008 онд дүүгийнхээ байгуулсан "Чоно" хамтлагт зориулан бүтээж, аяыг нь зохион бэлэг барьж байсан удаатай. “Аяганы хариу өдөртөө, агтны хариу жилдээ” гэдэг үгийн хариуг дүү Д.Дорждэрэм нь харуулан ахдаа зориулан рок попын уран бүтээлчдийн хамт шинэчлэн хүргэсэн нь энэ.   

 

  

Д.Дорждэрэмийн шинэчлэн дуулсан "Чамд таалагдахын тулд" дуу

 

---