Монгол Улсад химийн бодисын хуванцар савыг хүнсний зориулалтаар ашиглах нь түгээмэл байна. Энэ нь химийн бодисын хуванцар сав олдоц ихтэй, үнэ хямд байдагтай холбоотой. Гэр хорооллын айл өрхүүд худгийн ундны ус, малчид сүү, цагаан идээг хүнсний зориулалтын бус хуванцар сав, канистерт хадгалж, тээвэрлэж байгаа нь хүнсний аюулгүй байдал алдагдах, улмаар хүний эрүүл мэндэд сөргөөр нөлөөлөх аюулыг бий болгож буй. 

 

 

Засгийн газрын 2016 оны 287 дугаар тогтоолоор баталсан “Сав, баглаа боодол” үндэсний хөтөлбөрийн 3.2.10-д “Химийн бодисын хуванцар сав, торх, канистерыг хүнсний зориулалтаар ашиглуулахгүй байх зорилгоор "Шинэ санаа-шилдэг шийдэл" уралдаан зарлаж, дүнг нийтэд сурталчлах, түгээх” арга хэмжээ хэрэгжүүлэх талаар тусгасан. Энэ дагуу хүнсний зориулалтын бус хуванцар саваар хийсэн бүтээлийг шалгаруулах "Шинэ санаа-шилдэг шийдэл" уралдаан зарласан.

 

 

Уралдааны  гол зорилго нь химийн бодисын найрлагатай хуванцар сав, торх, канистерыг хүнсний бус ахуйн зориулалтаар ашиглах талаар иргэн, аж ахуйн нэгж, байгууллагын санаачилгыг дэмжих, хүнсний зориулалтын бус хуванцар савыг ашиглаж хийсэн бүтээлийг шалгаруулах, үр дүнг олон нийтэд сурталчлан таниулахад чиглэх юм. Ингэснээр хүнсний зориулалтын бус савыг ахуйн зориулалтаар ашиглах шинэ санаа, санаачилгыг дэмжих, шилдэг шийдлийг тодорхойлж үйлдвэрлэлд нэвтрүүлэх юм.  Тиймээс уг уралдааныг аж ахуйн нэгж, байгууллагын хүрээнд нээлттэй зохион байгуулах аж. Өнгөрсөн сарын  01-нээс зарласан уралдаан маргааш шилдэг бүтээлүүдээ шалгаруулна.  Уралдаанд тэргүүн, дэд, тусгай байрт шалгарсан бүтээлд дараах шагналыг гардуулна.

 

 

Тэргүүн байр-Сайдын батламж, 3 сая төгрөг
Дэд байр-Өргөмжлөл, 1 сая төгрөг
Тусгай байр- Өргөмжлөл, 500 мянган төгрөг
Уралдаанд тэргүүн, дэд, тусгай байранд шалгарсан бүтээл, тэдгээрийн эздийг МҮОНРТВ-ийн  зорилтот нэвтрүүлэгт оролцуулж, олон нийтэд сурталчлах гэнэ.

 

 

 

 

---