Ойрын өдрүүдэд улс төр халуухан буцалж байна. Ууган нам МАН-ыхан 60 тэрбум төгрөг “ярьсан” хэрэгтнүүд, ЖДҮ-ийн 65 тэрбум төгрөг “идсэн” хэрэгтнүүд гэх хоёр талд хэдийнэ гарч, хэн нь дийлж улс төрийн тавцанд цааш баттай зогсож чадах эсэхээ үзэхээр ач тач үзэлцэж байна. Тэднийг араас нь түлхэж нийгэмд улам муухай харагдуулах гэсэн АН-ынханы “түлхээ” ч дундуур нь цухалзаж эхэлсэн. Үүнтэй зэрэгцэн хэн хаанаас зохион байгуулж байгаа нь үл мэдэгдэх алдарт жагсагчид төрийн ордон тойрон өдөр өнжилгүй шахам гороолох болжээ. Тэдний хэлдэг үг, хийдэг жагсаал ерөнхийдөө ижил.

Автомашинтай жагсагчид

Өнгөрсөн долоо хоногжин талбай тойрон гороолж жагссан автомашинтай жагсагчдыг ард түмэн ихээхэн дэмжсэн. Тэдний ярьж байгаа зүйл үнэний ортой. Бензин шатахууны үнэ дэлхийн зах зээл дээр өдрөөс өдөрт буусаар байхад жижигхэн Монголд өдрөөс өдөрт нэмэгдсээр байна. Ард түмний амьдрал хэцүүдлээ. Засгийн газар ажлаа хий гэсэн шаардлагыг нь ард түмэн уухайлан дэмжсэн.

 

Жагсагчдыг автомашинтайгаа ордон тойрон гороолсон хоёр дахь өдөр Ерөнхийлөгч Х.Баттулга хүлээж авч уулзах сураг гарсан ч төдөлгүй сураг алдарсан. Гэтэл тэрний учиг өчигдөрхөн тайлагдаж жагсагчдыг Ерөнхийлөгч бус Ерөнхий сайд хүлээн авч уулзлаа.

Товчхондоо бол Засгийн газрыг ажлаа сайн хийхийг шахаж шавдуулж байсан жагсагчид У.Хүрэлсүхийн “жадны ир, сумны зэв” болохоор тохиролцоод гарч ирсэн аж. Үүнийг тэдний өөрсдийнх нь цахим хаяг дээрээ бичсэн зүйлс нотолно.

Одоо автомашинтай жагсагчдад бензиний үнэ сонин биш болж, 60 тэрбумынхныг хөөн зайлуулах Ерөнхийлөгчийн санаачилгыг Ерөнхий сайд У.Хүрэлсүхийн “захиалга”-аар гүйцэтгэхээр болжээ. 

Дараагийн жагсагчид буюу “Нэхүүл”

Өнөөдөр төрийн ордон тойрсон бас нэгэн жагсаал эхлэв. “Бид уучлахгүй” уриатай, Тайваньд сурч байгаа хэсэг монгол оюутны санаачилгаар эхэлж, зөвхөн сошиал ертөнцөөр жагсах санааг “Нэхүүл”-чид үндсэндээ copy pastе хийгсэд.

Бид уучлахгүй” уриаг нь авч “Нэхүүл” хэмээх содон нэрээр хачирласан жагсагчдын ард МОаХ-ынхан буюу Ерөнхийлөгчийн талынхан байгаа гэх. Тэдний хэлж ярьж байгаа үг бас л ард түмэнд таалагдахаар…

Тэдний сценари

Эхний сценариар бол тэд ЖДҮ-г уучлахгүй, 60 тэрбумыг уучлахгүй, төрийн мөнгөөр завшигсдыг уучлахгүй гэх зэргээр гарч ирнэ.

Хэд хоногийн дараа уриа нь бага багаар “хальтирна”. Төрийн албыг төрлийн алба болгосон улс төрчдөөс салах цаг иржээ. Ард түмэн дэмжээрэй гэх мэт уриа хөвөрнө. Иргэд ч дэмжинэ.

Эцсийн бүлэгт тэдний зорилго ил болно. Товчхондоо бол 60 тэрбумыг “идэхээр ярьсан” гэх хэрэгт буруутгагдаад байгаа УИХ-ын дарга М.Энхболд огцор, цаашилбал Ерөнхийлөгчийн санаачилгаар эхэлсэн УИХ тар гэдэг шаардлагад тулаад зогсоно.

Үүний дараа хэд хэдээр тогтохгүй жагсагчдын арми олноор төрнө. Тэдний зорилго ижил, хэлэх үг нь ижилдүү, хийх үйлдэл нь төстэй… 

Магадлалууд

Энэ үед жинхэнэ “захиалагч” дараагийн алхмаа хийнэ. Өөрөөр хэлбэл, ард түмний эсэргүүцэл туйлдаа хүрч байгаа тул УИХ тар гэсэн шаардлагыг арай үндэслэлтэй буюу хууль эрх зүйн түвшинд гаргаж ирнэ. Хуулийн заалтаар бол… гэсэн арай итгэл үнэмшил төрүүлэхүйц шалтгаар “довтолно”.

Дараагийн алхам. УИХ тарах эрх зүйн үндэслэлээр бол тэдэнд арай дөнгүүр наалдах нь “ард түмний санал асуулгаар одоогийн УИХ-ыг тараах нь зүйтэй” гэсэн зүйлчлэл рүү асуудлыг аваачна. Уур хилэн нь туйлдаа хүрсэн ард түмэн санал асуулгыг дор нь “бөглөх” магадлалтай.

Үүний дараа парламентийн засаглал Монголд тохирохгүй юм байна. В.Путин шиг удирдагч гарч ирж хэт “ардчилсан” монголчуудыг зангидаж чадна гэсэн “слоган” үг хүчтэй “дэмжигдэх” магадлалтай.

Эцсийн дүндээ цөхөрсөн ард түмний итгэл дээр тоглож эрх мэдлээ хэмжээлшгүйд хүргэх гэсэн хэн нэгний санаархал биеллээ олох магадлалтай.

Алдарт зохиолч Жорж Орвэлийн “Амьтны ферм” гэх алдарт зохиол амьдрал дээр биелэлээ олж, ардчилсан монголчууд популизм рүү хэт гүн хальтиран орох магадлал тун ойрхон иржээ…

---