УИХ-­ын Эдийн засгийн байнгын хорооны өчигдрийн хуралдаанаар “Ипотекийн зээл олголтын байдал, цаашид авах арга хэмжээ”-ний талаар Барилга, хот байгуулалтын сайдын мэдээллийг сонслоо. Барилга, хот байгуулалтын сайд Х.Баделхан танилцуулгадаа 2008­-2012 оны хооронд 42.6 мянга, 2013-­2016 оны хооронд 76 мянган иргэн ипотекийн зээлээр орон сууц худалдан авсныг дурдлаа.

2016 оноос Монгол Улс эдийн засгийн хямрал, хүндрэлийн улмаас ОУВС-ын “Өргөтгөсөн санхүүжилтийн хөтөлбөр”-­т хамрагдсан тул ипотекийн зээлийн санхүүжилтийн хэмжээ буурчээ. Улмаар ОУВС 2019 оноос эхлэн ипотекийн зээлийн хөтөлбөрийг цаашид Засгийн газрын мэдэлд шилжүүлэх шаардлагатай гэж үзсэн байна.

Түүнчлэн 2017 онд 111 тэрбум, 2018 онд 120 тэрбум төгрөгөөр ипотекийн хөтөлбөрийг санхүүжүүлжээ. Энэ оны эхний 10 сарын байдлаар хөтөлбөрийн зээлийн санхүүжилтэд 448.4 тэрбум төгрөг гаргаж, 7300 иргэн орон сууцтай болсон байна. Оны эцэс гэхэд энэ тоо нэмэгдэж, өнгөрсөн жилийнхтэй адил 10 мянган иргэн ипотекийн зээлд хамрагдана гэж үзэж байгаагаа салбарын сайд танилцуулгадаа онцоллоо.

---