Ашигт малтмал газрын тосны газраас өнөөдөр “Газрын тос, газрын тосны бүтээгдэхүүний талаар төрийн байгууллагуудад тулгамдаж буй асуудлууд” сэдэвт хэлэлцүүлгийг зохион байгууллаа. Хэлэлцүүлгийн үеэр уг салбарын гол бүтээгдэхүүн болох шатахуун, үүнтэй холбоотой үүсээд байгаа буй нөхцөл байдлын талаар санал солилцсон юм.

Газрын тосны бүтээгдэхүүнд шинжилгээ хийхэд ганц нэг стандартын хэмжээндээ хүрэхгүй тохиолдол гарсан

Сүүлийн үед хуурамч шатахуун, дутуу шахалт, шатахууны үнийн асуудал иргэдийн бухимдуулж, байгаа билээ. Энэ талаар ШӨХТГ-т энэ онд дээрх асуудлаар 200 гаруй санал гомдол ирсэн байна. ШӨХТГ-ын дэд дарга Н.Бямбацогт “Үнийн асуудал дээр манайх ямар нэгэн хяналт тавих үүрэг чиглэл байхгүй. Дутуу шахалттай холбоотой асуудлаар манайх он гарсаар 4-5 удаа шалгасан. Стандарт хэмжил зүйн газраас багаж хэрэгсэлтэй явж Улаанбаатар хотод түүвэр шалгалт хийхэд дутуу шахсан зүйл байхгүй байсан” гэсэн юм.

ГЕГ-ын Статискийн хэлтсийн байцаагч Ж.Батцэнгэл “Гаалиар орж байгаа боловсруулсан нефть бүтээгдэхүүн бол дөрвөн төрлийн татвар төлж байгаа. Гаалийн татвар, онцгой албан татвар, албан татвар, замын татвар тэгээд бас НӨАТ төлж байгаа. Гэтэл хуурамч шатахуун гээд яриад байгаа асуудал маань шатахууны нэмэлт 22 нэр төрлийн бүтээгдэхүүн онцгой албан татвар төлөхгүй байна гэсэн үг. Энэ асуудал дээр Мэргэжлийн хяналт нэлээн сайн ажиллах хэрэгтэй” хэмээв.

АМГТГ-ын Газрын тосны газрын асуудал хариуцсан орлогч дарга Ц.Эрдэнэбаяр “Газрын тосны бүтээгдэхүүнд шинжилгээ хийхэд ганц нэг стандартын хэмжээндээ хүрэхгүй тохиолдол гарсан бөгөөд үүнийг стандартын хэмжээнд хүргэх. Шатахууны түүхийн эд дээр онцгой албан татварын хувь хэмжээг тодорхой хэмжээнд тавих хэрэгтэй гэсэн дүгнэлтийг Сангийн яаманд хүргүүлсэн байгаа” гэсэн юм.

---