УИХ дахь МАН-ын бүлгийн дарга Д.Хаянхярваа Ерөнхий сайд У.Хүрэлсүх болон УИХ-ын дарга М.Энхболдод хандан шаардлага хүргүүлснээ өнөөдөр уншиж сонордууллаа.

ЖИДҮ-гийн гэх асуудал Засгийн газар руу чиглэж байснаа ХХААХҮ-ийн сайд Б.Батзоригийг огцруулсан, Монгол улсын Ерөнхийлөгч Х.Баттулгын зүгээс УИХ-ыг тараах албан бичиг өргөн барьсан зэрэг үйл явдлаас хойш Улсын их хурал руу чиглээд байсан юм. Энэ буруутгалыг эргүүлж, Засгийн газар руу хандуулах нэг акц нь өнөөдөр бүлгийн дарга Д.Хаянхярваагийн мэдэгдлээс харагдлаа гэж үзэх хүн байна. 

Тэрээр "ЖДҮХС-гаас өөрөө болон өөрийн хамаарал бүхий этгээдээр зээл авсан УИХ-ын гишүүдийг Ёс зүйн хороогоор оруулж, дүгнэлт гаргуулан, ёс зүйн хариуцлага тооцох, цаашилбал зээл авсан гишүүдийг огцруулах асуудлыг Ерөнхий сайд УИХ-д оруулж ирэх ёстой" гэж үзэж байгаагаа илэрхийллээ. 

Төрийн тусгай 29 сан байгаа. Энэхүү сангуудын үйл ажиллагааг Сангийн яамнаас гарсан ажлын хэсэг шалгаж байгааг МАН-ын бүлгийн дарга Д.Хаянхярваа хангалттай гэж үзсэнгүй. "УИХ-ын Төсвийн байнгын хорооноос ажлын хэсэг гаргаж шалгуулах, 3 хувийн зээлээ  ББСБ-аар "угааж" 30 хувийн зээл болгосон гэх мэдээллийн дагуу УИХ-ын ажлын хэсэг байгуулах шаардлагатай байгаа"-г тэрээр мэдэгдлээ. 

Зээлд холбогдсон албан тушаалтнуудыг УИХ-ын гишүүнээс чөлөөлөх, түүнчлэн МАН-ын Удирдах зөвлөлөөс чөлөөлөх, 11 сарын 20-ны дотор МАН-ын Бага хурлыг зарлахыг мөн шаардлаа. 

 

---