ДЭМБ-аас гаргасан цахилгаан шатнаас татгалзах, ажлын байр гэртээ идэвхтэй хөдөлгөөн хийх, зүрх судасны өвчнөөс сэргийлэх зэрэг зөвлөмжийн дагуу судалгаа хийсэн талаар Эрүүл мэндийн яам мэдэгдлээ. ЭМЯ-ны Нийгмийн эрүүл мэндийн газрын дарга Т.Энхзаяа, ЭМЯ-ны Бодлого, төлөвлөлтийн газрын дарга Р.Оюунханд, ЭМЯ-ны Олон нийттэй харилцах, тандалт, шуурхай удирдлагын хэлтсийн дарга Д.Нарангэрэл нарын хийсэн мэдэгдэлд "хүн амын өвчлөлийн тэргүүлэх шалтгаанд Халдварт бус өвчин буюу амьсгал, зүрх судас, хоол боловсруулах, шээс боловсруулах тогтолцооны өвчлөл орж байна" гэжээ.

 

 

Монгол улсын эрүүл мэндийн статистик үзүүлэлтээр зүрх судасны тогтолцооны өвчний нас баралт 10000 хүн амд 503,9 буюу нас баралтын тэргүүлэх шалтгаан болж байна. 2017 оны байдлаар Зүрх судасны тогтолцооны өвчний улмаас жил бүр 5000-5500 хүн буюу гурван хүний нэг нь нас барж байна.

Халдварт бус өвчин, нас баралтын шалтгаан болсон эрсдэлт хүчин зүйлсийн тархалтын судалгаагаар 15-64 насны хүн амын дунд хоёр хүний нэг нь илүүдэл жинтэй, гурван хүний нэг нь цусны даралт ихтэй, дөрвөн хүн тутмын нэг нь хөдөлгөөний хомсдолтой, хоёр эрэгтэйн нэг нь тамхи татдаг, гурван хүний нэг нь архи хэрэглэдэг, үүнээс 10 хүний тутмын нэг нь архийг хэтрүүлэн хэрэглэж байна.

Түүнчлэн гурав болон түүнээс олон өвчний эрсдэлтэй хүн амын эзлэх хувь 10.5 хувиар нэмэгдэж, өвчний ямар нэг эрсдэлт хүчин зүйлс огт илрээгүй хүн ам нэг хувьтай байна. Хэвийн жинтэй харьцуулахад таргалалтай хүмүүст чихрийн шижин-2 хэвшинжээр өвдөх эрсдэл 10-20 дахин их байна.

Дэлхийн эрүүл мэндийн байгууллагаас гаргасан ЗҮРХ СУДАСНЫ ӨВЧИН БУУРУУЛАХ 4 зөвлөмжийг хэрэгжүүлэхийг уриалав.

Жингээ барь, зөв зохистой хоолло, идэвхтэй хөдөллө, тамхи бүү хэрэглэ
Иймээс Та хаана ч байсан идэвхтэй хөдөлгөөн хийхийг эрмэлзээрэй
Ажлын байрандаа цахилгаан шат хэрэглэхгүй байх
Ажлын утас болон хэрэгтэй зүйлсээ өөрөөсөө хол байлгах
Ажлын байрны дасгал хийх
Гэртээ гэр бүлээрээ дасгал хөдөлгөөн хийх /бүжиглэх, гэрээ цэвэрлэхдээ дасгал хийх.../

ИДЭВХТЭЙ ХӨДӨЛГӨӨН ХИЙХИЙН АЧ ХОЛБОГДОЛ

Сэтгэл санаа тайвширч, стресс, бухимдлаас сэргийлнэ
Биеийн жинг хэвийн хэмжээнд байлгана
Зүрхний үйл ажиллагааг сайжруулна
Цусан дахь сахарын хэмжээг тэнцвэржүүлнэ
Цусны даралт ихсэхээс сэргийлнэ
Үе мөчний хөдөлгөөн сайжирна 

Иймээс хэвлэл мэдээлийн байгууллагуудтай хамтран  “Өдөр бүр -10000 алхам” уриан дор олон нийтэд эрүүл амьдралын хэв маягийг сурталчлах, тэднийг сэдээх, идэвхжүүлэх аянд нэгдэж ажиллахыг уриаллаа.

---