Эрүүл мэндийн яам 10 дугаар сарын 13-нд “1:2” зорилтыг дэвшүүлж үйл ажиллагаагаа эхлүүлсэн. Энэхүү зорилт нь эмнэлгийн тусламж, үйлчилгээнд ажиллах сувилагчийн тоог нэмэгдүүлж, 2020 гэхэд эмч, сувилагчийн харьцааг 1:2-т хүргэх зорилтын 50 хувьд хүрэхэд чиглэгдэж байгаа юм.

Өнгөрсөн хагас сарын хугацаанд гадаад оронд ажиллаж байгаад ирсэн, хүүхэд асрах болон бусад хувийн шалтгаанаар чөлөөтэй байсан, мэргэжлийн үйл ажиллагаа эрхлэх зөвшөөрлийн хугацаа дууссан зэргээр урт, богино хугацаанд мэргэжлээрээ ажиллаагүй 150 гаруй сувилагч Эрүүл мэндийн яам, Эрүүл мэндийн хөгжлийн төвд хандаж “Сувилагчийн мэдлэг, чадварыг бататгах” сургалт, “Мэргэжлийн үйл ажиллагаа эрхлэх зөвшөөрлийн шалгалтад бэлтгэх” сургалтад хамрагдах хүсэлтээ илэрхийлсэн.

Анагаахын шинжлэх ухааны үндэсний их сургууль Эрүүл мэндийн яамнаас дэвшүүлсэн “1:2” зорилтыг дэмжиж дээрх сургалтуудыг хамтран зохион байгуулж байна.

“Мэргэжлийн үйл ажиллагаа эрхлэх зөвшөөрлийн шалгалтад бэлтгэх” эхний сургалтыг 10 дугаар сарын 29-нөөс 10 дугаар сарын 31-ний өдрүүдэд зохион байгуулж, 42 сувилагч хамрагдсан. Харин “Сувилагчийн мэдлэг, чадварыг бататгах” эхний сургалтыг 10 дугаар сарын 19-нөөс 11 дүгээр сарын гуравны хооронд зохион байгуулж, 35 сувилагч суралцаад байна. Дээрх хоёр сургалтад хамрагдсан 77 сувилагч мэргэжлийн үйл ажиллагаа эрхлэх зөвшөөрлийн шалгалтаа амжилттай өгч дууслаа.

Эдгээр сувилагчдаас дутагдалтай орон тоог нөхөж, ажилд авах хүсэлтээ эрүүл мэндийн байгуулагууд ирүүлж эхлээд байна. Тухайлбал, 11 дүгээр сарын тавны өдөр Архангай, Дорноговь аймгийн Эрүүл мэндийн газар, Амгалан амаржих газар, Баянгол дүүргийн Эрүүл мэндийн төв, Сүхбаатар дүүргийн Нэгдсэн эмнэлэг, Эх, хүүхдийн эрүүл мэндийн үндэсний төв, Улсын II төв эмнэлэг зэрэг байгууллагууд нийт 12 сувилагчийг ажилд авчээ.

Хоёр дахь ээлжийн сургалтад нийт 76 сувилагч оролцохоор бүртгүүлсэн бөгөөд 11 дүгээр сарын 12-ны өдөр эхлүүлэхээр бэлтгэлээ хангаж байна.

Түүнчлэн орон нутагт эдгээр сургалтыг явуулах хэрэгцээг судалж байна.

---