Б.Есүй блицийн дэлхийн аварга болсон Монголын хоёр дахь тамирчин 

 Зуун буудалт даамын Өсвөр, залуучуудын ДАШТ Беларусь улсын Гомель хотод зохиогдож өндөрлөлөө.Тус тэмцээнд Монгол Улсаас 24 тамирчин дөрвөн насны ангилалд амжилттай өрсөлдсөн юм. Тэмцээний блиц (түргэвчилсэн) тоглолтод охидын 8-10 насны ангилалд өрсөлдсөн Батдаваагийн Есүй аваргалж дэлхийн аваргын медаль хүртэж, нутаг нэгтнүүдээ баярлуулсан билээ.

Тэрбээр 9 өрөг тоглохдоо 7 хожиж, 1 тэнцэн, 1 хожигдон, 15 оноо авч ийн аваргын болзол хангасан 

Тэрбээр "Монгени" сургуулийн сурагч, спортын мастер Д.Чойжилсүрэнгийн удирдлага дор бэлтгэлээ базаадаг. Тэрбээр 9 өрөг тоглохдоо 7 хожиж, 1 тэнцэн, 1 хожигдон, 15 оноо авч ийн аваргын болзол хангасан. Сонирхуулахад Б.Есүй блицийн дэлхийн аварга болсон хоёр дахь тамирчин юм. Өмнө нь 2016 онд Дорноговь аймгийн тамирчин Э.Хүслэн Туркийн Измирт болсон ДАШТ-ий түргэвчилсэн тоглолтын төрөлд түрүүлж байлаа. 

 

 Б.Мишээл 14 оноогоор аман хүзүүдэв

 Өнгөрсөн бямба гаригт өндөрлөсөн тэмцээний үндсэн төрлийн дүн гарахад охидын өсвөрийн ахлах нас буюу кадетын ангилалд өрсөлдсөн спортын мастер Баярын Мишээл 6 хожиж, 2 тэнцэн, 1 хожигдож, нийт 14 оноо авсан амжилтаар аман хүзүүдэн мөнгөн медаль хүртэв. Тэрбээр ОХУ-ын Ольга Балуковатай адилхан оноотой гарсан ч нэмэлт үзүүлэлт буюу коэффициентийн зөрүүгээр ард нь бичигдсэн юм.

 Б.Мишээл өмнө нь 2016 онд Туркийн Измирт зохиогдсон өсвөрийн ДАШТ-ий блиц төрлөөс хүрэл медаль хүртсэн амжилттай.Тэмцээний охидын 8-10 насны ангилалд гараанаас эхлэн тэргүүлсэн Б.Есүй есдүгээр тавилдаа Беларусийн тамирчинд харамсалтайгаар хожигдон, коэффициент тоолоход IV байр, охидын 11-13 насанд Б.Лхагвадолгор сүүлийн учраа болох Хятадын тамирчинтай тэнцэж, V байранд шалгарсан байна. Хэрвээ хожсон бол хүрэл медаль атгах байв. Хөвгүүдээс хамгийн өндөр амжилтыг 14-16 насанд М.Лувсандорж үзүүлж, V байр эзэлсэн.

 

Манайхан ч даам өндөр хөгжсөн орнуудын туршлагыг тусгаж, өнөө жилээс эхлэн шигшээ багийн тамирчдаа их мастер цолтнуудаар бэлдүүлэх болсон. Тодруулбал ДАШТ-д Монголын баг тамирчдыг холбооны ерөнхий нарийн бичгийн дарга ОУИМ Р.Манлай ахлан, ОУИМ Г.Ганжаргал ерөнхий дасгалжуулагчаар, спортын мастер Д.Чойжилсүрэн, Р.Нармандах нар дасгалжуулагчаар ажиллаж буй.

---