Өмнөд Солонгос улс бол манай иргэдийн хамгийн ихээр зорьж, ажил хөдөлмөр эрхэлдэг улс. Хүнд хүчир, урт ажлын цагийг арай гэж баран үр хүүхэд, гэр бүлээ тэжээх хэдэн төгрөг цуглуулсныхаа төлөө эрүүл мэндээ алдах нь цөөнгүй.

Гэтэл энэ асуудал зөвхөн цагаач иргэд, гадны ажил эрхлэгчдэд тулгардаг асуудал биш бололтой.

 

 

БНСУ-д өнгөрсөн долдугаар сард долоо хоногт ажил эрхлэх хугацааг 68 цагаас бууруулж 40 цаг болгох санал баталсан. Мөн заасан хугацаанаас илүү цаг ажиллавал хуулийн дагуу хөдөлмөрийн хөлсийг нэмж төлнө гэжээ. Гэтэл хэт их ажлын ачаалалд дарагдаж амиа алдсан иргэдийн тоо нэмэгдсээр байна. 

Хатагтай Пак Хюн Сүк бол бэлэвсэн эхнэр. Түүний нөхөр 2015 онд хувийн компанид ажилд орж долоо хоногийн таван өдөрт судалгаа хийн, бямба гаригт бичиг цаасаа цэгцэлж, ням гаригт хамтран ажиллах байгууллагуудтай утсаар ярьдаг байв.

 

 

Гэтэл ажилд ороод хоёр жил гаруй болоод нэгэн өглөө урьдын адил гарч яваад эргэж ирсэнгүй.

Ажлынхан нь түүнийг шатнаас унаж амиа алдсан байхыг олов. Гэхдээ өнөөдрийг хүртэл үхлийн шалтгаан нь тогтоогдоогүй.

Нөхрийнх нь ажил анх 30 хүнтэй, ачаалал ихтэй байж. Хоёр жилийн дараа 80 хүнтэй болсон ч ачаалал нь улам нэмэгдсэн гэж хатагтай Пак ярьжээ. Энэ бол хэт их ажил хийснээс болж амиа алдсан олон зуун хүний жишээ юм.

ХБНГУ бол аж үйлдвэржсэн орон. Гэтэл Өмнөд Солонгост ажиллах цаг Германаас хоёр дахин илүү байна. Нөгөө талаар хэт урт цагаар ажиллаж, ажлын байрандаа амиа алдсан хүмүүсийн ар гэрийнхэн нөхөн олговор авахад тун хэцүү гэжээ.

“Удаан хугацааг ажил дээрээ өнгөрүүлбэл сайн ажиллаж байна гэж бодох нь өрөөсгөл, хоцрогдсон ойлголт” гэж хатагтай Пак ярьсан байна.

Одоогийн Ерөнхийлөгч Мүн Жэ Ин хэт уртасгасан цагаар ажиллаж амиа алдаж байгаа тохиолдлыг бууруулахын тулд ажлын цагийг багасгах хууль баталсан нь ирэх онд хэрэгжиж эхэлнэ.

Ажлын цагийг бууруулж, гараагаа эхлүүлж байгаа бизнесийн байгууллагууд ажилчдын тоог 300-аас дээш байх дүрэм баталжээ.

Үүний ачаар олон мянган ажлын байр шинээр бий болох ч ашиг олохыг хүсдэг бизнес эрхлэгчид тийм ч таатай хүлээж авдаггүй байна.

Эх сурвалж: www.cnn.com

---