Монгол улсын Ерөнхийлөгч, УИХ-ын хоорондын зөрчил улам хурцадсаар байна. УИХ-ыг тараах саналыг УИХ-ын даргад өргөн бариад байгаа. Энэ албан бичгийг энэ долоо хоногийн УИХ-ын чуулганаар хэлэлцэнэ.

Мөн Ерөнхийлөгчийн санал болгосон ирэх оны төсөвт 15 хувийн хэмнэлт хийх санаачилгыг Засгийн газрын тэргүүн, УИХ-ын дарга нар өнгөндөө зөвшөөсөн мэт боловч, цаагуураа үл зөвшөөрснөө өнгөрсөн баасан гаригт чуулганаар 2019 оны улсын төсвийг баталснаар харууллаа. Эх сурвалжийн мэдээлж байгаагаар өнөө, маргаашдаа багтан Монгол улсын Ерөнхийлөгч Х.Баттулга 2019 оны улсын төсөвт хориг тавина гэсэн мэдээлэл байна. Харин УИХ энэхүү хоригийг хүлээн авахгүй байх магадлал өндөр байгаа.

Монгол улсын Ерөнхийлөгчийн хоригийг УИХ хүлээн авдаггүй жишиг тогтоод байгаа гэхэд дэгсдүүлсэн болохгүй. Өнгөрсөн удаад Ерөнхийлөгч хоёр удаа хориг тавиад хоёуланд нь УИХ хүлээн аваагүй байна. Хамгийн анх буюу 2017 оны 11 дүгээр сарын 02-нд Монгол Улсын Засгийн газрын гишүүдийн томилох тухай Улсын Их Хурлын 2017 оны 10 дугаар сарын 20-ны өдрийн 58 дугаар тогтоолын 1 дүгээр заалтын 6 дахь дэд заалтад тавьсан Монгол Улсын Ерөнхийлөгчийн хоригийг хэлэлцэн, хоригийг хүлээн авах боломжгүй гэж УИХ шийдвэрлэсэн.

Удаад нь 2018 оны төсвийг “хэт үрэлгэн” гэж үзээд зарлагын хэсэгт хориг тавьж байсан. “Эдийн засаг туйлдаж хүндэрсэн гэдэг шалтгаанаар ард иргэддээ ачааны хүндийг үүрүүлэх цөөнгүй шийдвэрийг гаргасан УИХ төсвийн зарлагаа бууруулж, алдагдлаа багасгах тал дээр дорвитой бодлого хэрэгжүүлж, тодорхой арга хэмжээ авахгүй байна” хэмээн үндэслэлдээ дурьдсан. Гэвч үүнийг УИХ мөн л хүлээн аваагүй.

Ерөнхийлөгч гуравдахь удаагаа буюу 2019 оны улсын нэгдсэн төсөвт хориг тавих ба УИХ мөн л хүлээн авахгүй байх өндөр магадлалтай боллоо. Үндэсний аюулгүй байдлын зөвлөлийг бүрдүүлдэг хоёр институт хоёр тийшээ хараад суучихлаа. Байдал цаашдаа хэрхэн үргэлжлэх бол?

---