Малын генетик нөөцийн тухай хуулийн хүрээнд баталгаажсан үүлдэр, омгийн малын цөм сүргийг бүрдүүлэх, үзлэг ангилалт хийх ажлыг Хүнс, хөдөө аж ахуй, хөнгөн үйлдвэрийн яам зохион байгуулж байна. Одоогийн байдлаар 16 аймгийн 53 сумын 369.1 мянган толгой малд үзлэг, ангилалт хийж, ангилалтад хамрагдсан малаас 150 мянган малыг ялган тэмдэглэж ээмэгжүүлжээ. Мөн дээрх аймаг, сумын 147 мянган хуц, ухныг ялган төвлөрүүлж, удам зүйн үнэлгээнд оруулах, үнэлэх ажлыг эхлүүлээд байна. Ингэснээр үржилд ашиглаж буй хээлтүүлэгчийн чанарыг тодорхойлж, стандартын шаардлага хангаагүй хээлтүүлэгчийг үржилд ашиглахгүй байх нөхцөл бүрдэх гэнэ.

Түүнчлэн одоогийн байдлаар малын гоц халдварт шүлхий өвчнөөс урьдчилан сэргийлэх дархлаажуулалтад 10,2 сая мал, бог малын мялзан өвчнөөс урьдчилан сэргийлэх дархлаажуулалтад 13,8 сая, цэцэг өвчнөөс урьдчилан сэргийлэх дархлаажуулалтад 8,5 сая малыг хамруулж, нийт 32,5 сая малыг дархлаажуулаад байна. Энэ бүхэн нь мал, амьтны эрүүл мэндийг хамгаалах хүрээнд авч хэрэгжүүлж буй нэн чухал ажил ажээ.

 

---