“The Next Big Shift”

“The Next Big Shift” сэдвийн дор хэлэлцэж байгаа маркетеруудын зургаа дахь удаагийн чуулга уулзалт Төрийн ордонд зохион байгуулагдлаа. Энэ удаагийн уулзалт арга хэмжээ “Монгол улсын Засгийн газар жил бүрийн 10 дугаар сарын 20-ны өдрийг албан ёсоор маркетеруудын өдөр болгон тэмдэглэх тогтоолыг баталсан” сайхан мэдээгээр эхэллээ.

 

 

Монголын Үндэсний маркетингийн холбооны удирдах зөвлөлийн дарга Ж.Золзаяа арга хэмжээг нээж, дэлхийн 12 оронд салбартай “Montgomery Fitch & Associates” маркетингийн компанийн гүйцэтгэх захирал Филиппиний иргэн Льюс Арканзел хэлэлцүүлгийн үндсэн сэдвээр илтгэл тавьсан.

 

 

Хөтөлбөр шилжилт ба өөрчлөлт, амжилт ба туршлага, маркетеруудын ур чадвар арга барил гэсэн гурван үндсэн сэдвийн хэлэлцүүлэг, бусад илтгэлүүдээр үргэлжилсэн. Илтгэгчдийн танилцуулсан санаа, хэлэлцүүлгийн үндсэн сэдвүүд дэлхий даяараа хувьсан өөрчлөгдөж байгаа цахим технологийн эрин үед Монгол улс хэрхэн энэ өөрчлөлтөд нэгдэж, бусдаас хоцролгүй шинэ эринд хөл тавих талаар онцлон тусгаж байсан юм.

Монгол улсын цахим шилжилт ба маркетинг

Монгол улсын нийт хүн амын интернэт хэрэглэгчийн тоо 93 хувьтай, дата хэрэглэгчдийн тоо өнгөрсөн жилийнхээс 50 хувиар өссөн, үүрэн телефон хэрэглэгчдийн тоо дэлхийн бусад орнуудтай харьцуулахад өндөр байдаг. Тиймээс ирээдүйд цахим зах зээлд шилжих, мобайл засаглалыг хөгжүүлэхэд Засгийн газрын үйл ажиллагаа чиглэхийг хэлэлцүүлэгт оролцсон шилдэг маркетерууд танилцуулсан.

 

 

Орчин цагт бизнесийн үйл ажиллагаа байгууллагааас иргэн төв рүү шилжиж амжилтад хүрнэ гэлээ. Түүнчлэн ирэх жилд IPv6 технологи руу шилжэхээр Монгол улсын Засгийн газар төлөвлөж байна. Дэлхийн улс орнуудтай хөл нийлүүлэн алхахын тулд төрийн захиргааны байгууллагууд технологийн дэвшлийг эрэлхийлж байгаа хувийн хэвшлийн компаниудтай хамтран ажиллах хэрэгтэй гэдгийг хэлэлцүүлгийн үеэр онцоллоо.

 

Мэдээллийн нээлттэй байдал ба аюулгүй байдлыг хамгаалах нь

Монгол улсын хуулинд төрийн мэдээллийг бүрэн нууцална гэж тусгасан байсан ч сүүлд шинэчилсэн байдлаар тухайн байгууллага өөрсдийн эрх мэдлийн хүрээнд мэдээллээ нууцлах үүрэгтэй болсон. Open data буюу мэдээллийн нээлттэй байдлыг баримтлахдаа тодорхой цензуртэй болгох шаардлагатай. Хэрэв ашиглаж, эргэлтэд оруулахгүй бол их хэмжээний мэдээлэл хадгалаад үнэ цэнээ алдах нь тодорхой гэдгийг хэлэлцүүлгийн үеэр хэлэв.

Мэдээлэл технологийн аюулгүй байдлыг хангахын тулд иргэн бүр дор бүртээ ухамсар, хариуцлагатай хандаж үл таних хаягийг хүлээж авахгүй байхыг ЦЕГ-ын газрын Урьдчилан сэргийлэх хэлтсээс сануулсан. Тиймээс ч UNFREIND хөдлөгөөнийг хэрэгжүүлсэн ба дараагийн удаад “Цахим орчныг эерэгээр хэрэглэе” гэсэн уриалгыг дэвшүүлж, төсөл хөтөлбөр хэрэгжүүлнэ гэлээ. Бүх салбарт цахим хэрэглээг нэвтрүүлэхийн тулд тухайн байгууллага сервер дэх мэдээллээ хамгаалах шаардлагатай. Манай улсад энэ орчин хараахан бүрэн бүрэлдээгүй байна.

 

 

IPO бол маркетингийн салшгүй хэсэг

Хэрэв хэрэглэгч IPO авбал тухайн брэндийнхээ хэрэглэгч болж эхэлдэг. Lend.mn, Shoppy.mn компаниуд Монгол улсад IPO хувьцаагаа гаргаад зогсохгүй Азийн хүн ам ихтэй Филиппин, Мьянмар улсуудын зах зээлд нэвтрэхээр судалж, туршилтаа эхлүүлж байна. Мөн дотооддоо хувьцаа гарган борлуулж буй санхүүгийн томоохон байгууллагууд цаашдын ирээдүйд цахимжиж, хэрэглэгч ба байгууллагын харилцан итгэлцлийг бүрдүүлэх болно гэдгийг “Ард санхүүгийн нэгдэл”-ийн гүйцэтгэх захирал Ч.Ганхуяг хэлэв.

 

 

Бидэнд технологи ашиглаж монгол брэндийг гадны улс орнуудад хямд төсөр аргаар таниулах, худалдаалах боломж хангалттай бий гэдгийг хэлэлцэгчид ярьж байсан юм. Тодруулбал, гадны хэрэглэгчид цахим ертөнцөөс юуг илүү сонирхож байгаа тухай мэдээллийг олж авах боломж хангалттай, тиймээс гадны хэрэглэгчдийн хүсэл сонирхолд нийцсэн барааг ханган нийлүүлэх боломж нээлттэй гэсэн үг.

 

AI буюу хиймэл оюун ухааны хөгжил

Дэлхийн нийтээрээ хиймэл оюун ухааныг салбар бүрт ашиглаж байна. Монгол улсад ч мөн хиймэл оюун ухааныг ашиглахаар туршиж эхлээд байна. Shoppy.mn компани мэдээлэл солилцох, хэрэглэгчдийн хүсэл шаардлагыг хангахаар үйл ажиллагаагаа явуулдаг. Хиймэл оюун ухааныг өөрсдийн үйл ажиллагаанд ашиглаж эхэлжээ.

Энэ талаар арга хэмжээний үндсэн хэлэлцүүлгийн панелистуудын нэг Shoppy.mn-үүсгэн байгуулагч Ц. Мэндбаяраас тодруулахад:

“Хиймэл оюун ухааныг Монголд төдийлөн олон компани ашиглаж эхлээгүй. Одоогоор Lend.mn болон Shoppy.mn компаниуд худалдааны салбарт хэрэглэгчдийн эрэлт хэрэгцээг хялбар, ухаалаг аргаар хангахад ашиглаж байна. Дэлхийн нийтийн жишгийг харахад хиймэл оюун ухааныг төрөл бүрийн салбар чиглэлд ашиглахад хүний хөдөлмөрийг хөнгөвчилж байна” гэлээ.

 

---