МУУГЗ, Монголын хөгжмийн зохиолчдын холбооны шагналт, Пентатоник наадмын таван удаагийн шагналт, хөгжмийн зохиолч Л.Балхжавын “Миний дуунууд 2018“ тоглолт энэ сарын 26, 27-нд Улаанбаатар паласт болов. 20 дахь жилдээ болж буй уг тоглолтыг хүнтэй зүйрлэж хэлбэл “Эрийн цээнд хэдийнэ хүрчээ”.

Уран бүтээлийн дөрөө хамтдаа харшуулж, олз омог арвинтай яваа андынхаа тоглолтыг жил бүр сэтгүүлч, яруу найрагч Ш.Гүрбазар хөтөлдөг. Энэ удаагийн тоглолтыг жүжигчин Т.Бархүү, П.Одгэрэлтэй хамт хөтөлсөн нь тоглолтын уур амьсгалыг сонирхолтой болгож, үзэгчдийг хөгжөөж байлаа. 

 

Энэ жил Л.Балхжавын хөгжмийн урлагт хөл тавьсны 45 жилийн ой, тоглолтынх нь 20 жилийн ойтой давхцсан юм.Түүнтэй хамт тайзан дээр 20 жилийг угтаж, үдсэн уран бүтээлчид ойд нь зориулан нэгэн сюрприз барьсан нь төрсөн өдрийн бялуу байв. “Миний дуунууд 2018” тоглолтын оршил хэсгийг өнгөрсөн хавар дэлгэцийн бүтээл болж олонд хүрсэн “Говийн домог” киноны дуу болох ”Зүрхний амраг”-аар  дуучин, жүжигчин Б.Замилан, мөн жүжигчин Ч. Очгэрэл “Содура” кино дуу болох “Хайр”-аар эхлүүлсэн юм. 

Тоглолтын өрнөл дунд хэсгийг Б.Амархүү"Дугуйн хээтэй наадам", “Хар сарнай” хамтлагийн ахлагч С.Амармандах “Үзэсгэлэнт бүсгүй”, мөн “Номин талст” хамтлагийн дуучин Т.Дэлгэрмөрөн “Үүр битгий цайгаасай”, “Sweetmotion“ хамтлагийнхан ”Орон зай”, “Шувуудын цувааг битгий тоолоорой”, МУГЖ Г.Ариунбаатар, Б.Уянга нар “Гүрэн монгол чинь хүлээнэ”, “Чингис хаан” хамтлагийн дуучин Д.Жаргалсайхан “Харийн нутаг”, “Хурд” хамтлагийнхан “Би Монголтойгоо адилхан” дуугаар үргэлжлүүлж  үзэгчдийг суудлаас нь бостол өндөлзүүлэв.

 

“Би Монголтойгоо адилхан” дууг тайзан дээр эгшиглүүлэх үед яруу найрагч Ш.Гүрбазар үзэгчдийн суудлаас тайзан дээр гарч шүлгээсээ уншиж сонирхуулан тоглолтыг үргэлжлүүлэн хөтлөх болсноо дуулгахад Л.Балхав андыгаа “Гүрээ минь чи тайзан дээр дураараар дургиж, дунд чөмгөөрөө жиргэ дээ” хэмээн хошигнож амжив.

 

Хөгжмийн зохиолч “Миний дуунууд” тоглолтоо 20 жил тасралтгүй үргэлжлүүлэхдээ Монголын орчин үеийн урлагийн түүхийн нэгээхэн хэсгийг бичилцсээр ирсэн гэдэгтэй хэн ч маргахгүй биз. Үүнийг 20 жил толилуулсан уран бүтээлийнх нь тухай өгүүлэх гэрэл зургийн үзэсгэлэн батлан харуулж байлаа.

 

“Миний дуунууд” тоглолтын гол онцлог нь монголын рок, попын үе үеийн шилдэг уран бүтээлчдийг тайзан дээр хоёр үдэш “уяж саатуулан” нэг дор цуглуулан үзэгчдэд харуулах боломж олгодог. Энэ тоглолтод оролцдог уран бүтээлчид ч гэсэн үзэгчдэд нэгэн шинэ бэлэгтэй ирдэг уламжлалтай, тэр нь шинэ дуу юм. МУГЖ Т.Ариунаа, жүжигчин Т.Бархүү нар “Чамдаа уусна” шинэ дуугаа толилуулж хуран цугласан олныг уяраав. Мөн МУГЖ Б.Сарантуяа рок, поп урлагт хөл тавьж буй шинэ залуу дуучидтай шинэ цомогтоо орсон попури дуунуудаасаа дээжлэн толилуулсан юм.      

             

Тоглолтын төгсгөл хэсгийг Төрийн соёрхолт дуучин Д.Болд “Хээрийн салхитай Монгол аялгуу”, МУГЖ Б.Сарантуяа “Салхины хээ”, Т.Ариунаа “Нулимсаа арч охин минь”, Х.Лхагвасүрэн “Үзэсгэлэнт минь” дуугаа дуулж үзэгчдийн сэтгэлийг догдлуулж “цөсийг нь хөөргөв”.

Сонирхуулахад 1999 онд  болсон “Миний дуунууд” тоглолтод гавьяат жүжигчин Т.Ариунаа давхар биетэй дуулж байсан өдгөө хүү нь 20 нас хүрч гадаадад суралцахаар явжээ. “Өглөө шиг эх орон” дуугаар өндөрлөсөн тэртээ хол сонсогдох 20 жилийн “Миний дуунууд 2018” рок, попынхны дурсамж сэргээсэн, уран бүтээлийнхээ түүхийг эргэн харуулсан сайхан тоглолт боллоо.

   

 

 

 

---