Манай эмэгтэй бөхчүүд багаараа V байрт шалгарав

2018 оны насанд хүрэгчдийн ДАШТ-ий чөлөөт бөхийн эмэгтэйчүүдийн төрөл 10 сарын 22-25-нд Унгарын нийслэл Будапештэд боллоо. Эмэгтэйчүүдийн 30 дахь удаагийн тэмцээнд 52 орны 234 тамирчин 10 жинд өрсөлдөв. Манай улсаас багаараа оролцсоноос гавьяат тамирчин Очирбатын Насанбурмаа 72 кг-д мөнгөн, ОУХМ Баатаржавын Шоовдор 59 кг-ын жинд хүрэл медаль хүртэж, долоон тамирчин шагналт байрт орж, 71 оноогоор V байр эзэлсэн амжилттай өндөрлүүллээ.

Хойд хөршийн эмэгтэй бөхчүүд Будапештэд ирсэн ч ганц ч медальгүй нутаг буцав. Оросууд 1997, 2012 оны ДАШТ-д хоосон буцаж байжээ. 57 кг-ын жинд эзэн орны Эмесе Барка Унгарчуудын анхны медалийг авчирлаа. 
Наймдугаар сард Азийн наадамд ганц ч алтан медаль хүртэж чадаагүй Японы эмэгтэй бөхчүүд Будапештэд дөрвөн алт, нэг мөнгө, хоёр хүрэл медальтай 156 оноогоор багийн дүнгээр тэргүүлж, БНХАУ 119 (1 алт+ 4 хүрэл), АНУ 103 (1 алт+1 мөнгө+2 хүрэл) оноогоор удаалав.

ЭМЭГТЭЙЧҮҮДИЙН ДҮН
50 кг (23 бөх): 1.Юи Сүсаки (Япон) 2.Мария Стадник (Азербайжан) 3.Сун Янан (БНХАУ), Оксана Ливач (Украин) ...9.Эрдэнэсүхийн Нарангэрэл (Монгол)
53 кг (24): 1.Харүно Окүна (Япон) 2.Сара Хильдбрандт (АНУ) 3. Пан Киану (БНХАУ), Диана Мэри Уикер (Канад) ...10.Эрдэнэчимэгийн Сумъяа (Монгол)
55 кг (22): 1.Майю Мүкаида (Япон) 2.Залина Сидакова (Беларусь) 3 Йон Ми Йон (БНСУ), Монтеро Эррера (Куба) ...9.Эрхэмбаярын Даваачимэг (Монгол)
57 кг (26): 1.Рон Ниннинг (БНХАУ) 2.Бильяна Дудова (Болгар) 3.Эмесе Барка (Унгар), Данда Поожа (Энэтхэг) ...22.Алтанцэцэгийн Батцэцэг (Монгол)
59 кг (22): 1.Рисако Кавай (Япон) 2. лиф Есилирмак (Турк) 3.Баатаржавын Шоовдор (Монгол), Пей Шинру (БНАХАУ)
62 кг (26): 1.Тайбе Юсейн (Болгар) 2 Юкако Кавай (Япон) 3.Мэллори Вельт (АНУ), Юлья Ткач (Украин) ...7.Энхбатын Гантуяа (Монгол)
65 кг (23): 1.Петра Олли (Финланд) 2.Даниэль Лаппаж (Канад) 3.Ирина Нетреба (Азербайжан), Аяна Жемпей (Япон) ...8.Хүрэлхүүгийн Болортуяа (Монгол)
68 кг (27): 1.Алла Черкасова (Украин) 2.Кумба Ларрок (Франц) 3.Зоу Фенг (БНХАУ), Тамира Мынса (АНУ) ...7.Соронзонболдын Батцэцэг (Монгол)
72 кг (18): 1.Жюстина Ди Стасио (Канад) 2.Очирбатын Насанбурмаа (Монгол) 3.Бусе Тосун (Турк), Мартина Кюнц (Австри)
76 кг (23): 1.Аделин Грей (АНУ) 2.Ясмин Адар (Турк) 3.Хироэ Сүзүки Минагава (Япон), Эрика Уибе (Канад) ...9.Гилэгжамцын Наранчимэг (Монгол)

 Монголчууд аа "Чамлахаар чанга атга"

Будапештийн дэвжээн дээр тэгж их шүүмжилсэн олны нүдэн дээр тэрбээр амжилтаараа хариу барьж, хичээж, зүтгэснээ ч харууллаа. “Надад итгэж болно” гээд шагналын тавцан дээр хүртсэн мөнгөн медалиар бэлэг барив.

Нэгэн зүйлийг хэлэхэд хэдхэн сарын өмнө Очирбатын Насанбурмааг спорт сонирхогчдоос зарим нь “Чи одоо болиоч ээ, чадахгүй юм байж зодог тайлаач, гарч ирж байгаа залуу тамирчдад халаагаа өг, чиний үе дуусаж байна” зэргээр коммент бичиж, элдвээр хэлж гомдоон, урмыг нь хугалсан удаа бий. Ингэж хэлсэн хүмүүс түүний амьдралаа спортын төлөө харамгүй золиослож, амжилтын төлөө амралт гэж байдгийг ч мартаж зүтгэсэн өдөр хоног, он жилүүдийг мартсан уу?. Бөхийн спортоор хичээллэдэг тамирчин хүний нэг өдрийн бэлтгэл хийх нь хүртэл тэвчээр гаргах, хөлс дуслуулах, өвдөх  эрхгүй, бусдын адил дуртай үедээ наргиж цэнгэх ч эрхгүй ямар хэцүү байдгийг тэд биеэрээ мэдэрсэн гэж үү? Өөрийн нэрээ бус эх орныхоо нэрийг спортын ертөнцөд, дэлхийн дэвжээнд гаргахын тулд тэрбээр өөрийн дуртай олон зүйлээс татгалзаж, магтаал, шүүмжлэлийн гал дундуур саад бэрхшээлийн шуургыг чамгүй сөрсөн.

Спорт өндөр хөгжсөн өрсөлдөгч орнуудын тамирчдаас чөлөөт бөхийн дэвжээнээс дэлхийн аваргын гурван мeдаль хүртэнэ гэдэг тийм ч амар биш шүү. Тэгвэл Будапештийн дэвжээн дээр тэгж их шүүмжилсэн олны нүдэн дээр тэрбээр амжилтаараа хариу барьж, хичээж, зүтгэснээ ч харууллаа. “Надад итгэж болно” гээд шагналын тавцан дээр хүртсэн мөнгөн медалиар бэлэг барив. Одоо энэ бүсгүй дэлхийн аваргаас дөрвөн мeдаль хүртсэн Монголын анхны тамирчин болчихлоо. Харин түүнийг хачин янзаар хэлж байсан нөхөд одоо амаа олохгүй өөр хоорондоо магтах болов уу? Монголчууд аа “Чамлахаар чанга атга” гэдэг үг бий. Амжилтын төлөө ар гэрээ мартаж, эх орон, ард түмнийхээ нэрийг гаргахын төлөө энэ биеийнхээ нуруун дээр даамгүй том ачаа, үүрэг хариуцлага үүрдэг тамирчдаа хайрла, бас урам хайрлаж сур. Монголын нэрийг тэд дэлхийд таниулж ирсэн, хойшид ч таниулсаар байх болно.

 

 

---