Улсын онцгой комиссоос өнөөдөр мэдээлэл хийлээ. 

ГХЯ-ны Консулын газрын дарга Л.Мөнхтүшиг:

-Өнөөдрийн байдлаар 81 улсаас 23 мянга гаруй иргэдийг авчраад байна. Энэ сард 11 удаагийн тусгай үүргийн нислэг үйлдэнэ.

Гадаадад байгаа ЭСЯ-аар дамжуулан нутаг буцах хүсэлтэй иргэдийн нарийвчилсан мэдээллийг авч байгаа. Аравдугаар сард нутаг буцах хүсэлтэй 3000 орчим иргэн байгаагаас 2500 орчим нь БНСУ-аас ирэх хүсэлтэй иргэд. АНУ-аас 205, Европын улсуудаас 490 иргэн ирэх хүсэлтэй байгаа.

Одоогийн байдлаар нийт 4500 орчим иргэн ирэх хүсэлтээ гаргаад байна. Энэ сард 2700 орчим иргэнийг авчирна гэж тооцоолсон. Тэгэхээр энэ сарын сүүлээр яаралтай нутаг буцах хүсэлтэй иргэд буурч гадаадад байгаа иргэдээ татан авч дуусаж байна.

2020 нэгдүгээр сарын 20-ноос манай улс богино хугацааны визийг олгохоо зогсоосон байсан. Тэгвэл албаны болон бизнесийн журмаар гадаадаас ирэх иргэдэд 30 хоногийн виз олгохоор болсон. Гадаадаас ирж байгаа гадаадын иргэдийн хувьд тусгай үнээр зочид буудалд 21 хоног тусгаарлагдан дахин 30 хоног Монгол Улсад байж болно. Тэгэхээр гадаадаас ирж байгаа гадаадын иргэд 60 хоног манай улсад байх боломжийг олгож байгаа юм.

---