Манай улсад хариуцлагагүй уул уурхайгаас үүдсэн олон асуудал үүсдэг. Тухайлбал, малчид, мал амьтан хохирч, энд тэнд эвдэрч сүйдсэн олон газар нутаг үлдэж хоцордог.

Уул уурхайн чиглэлээр үйл ажиллагаа явуулдаг компаниудын үйл ажиллагаа ил тод, хариуцлагатай болгох шаардлага бий гэж салбарынхан онцолдог. Тэгвэл Эрдэс баялгийн салбарын ил тод байдлын тухай хуулийг боловсруулж, иргэний нийгмийн байгууллагуудаас санал авч эхэлжээ. Энэ талаар бид тодруулж байна.

"Хил хязгааргүй алхам" ТББ Н.Баярсайхан:

-Манай улсад уул уурхайн хайгуулын болон олборлолтын 3000 гаруй лиценз олгогджээ. Уул уурхайгаас олох орлого улсын төсвийн 30 орчим хувийг бүрдүүлж байна. Гэвч ядуурал нэмэгдэж, байгаль орчны сөрөг нөлөөлөл нэмэгдэж, цөлжилт нэмэгдсээр байна. Энэ бол уул уурхайг хариуцлагатай байлгах шаардлага байгааг харуулж байна. Тиймээс Эрдэс баялгийн салбарын ил тод байдлын тухай хуулийг боловсруулж байна. Нэг жишээ дурдъя:

Манай улсад тусгай зөвшөөрөлтэй 2300 компани байна. Тэд ирэх жилд хийх нөхөн сэргээлтийнхээ барьцаа хөрөнгийг байршуулах хуультай. Гэвч барьцаа байршуулдаг эсэх нь тодорхойгүй, БОАЖЯ нь ч барьцааг авдаг эсэх нь бүрхэг, хаалттай байна. Харин ТББ-уудын хамтын ажиллагааны үр дүнд дээрх мэдээллийг хайж олоход тусгай зөвшөөрөлтэй компаниудын ердөө 10 хүрэхгүй хувь нь барьцаа байршуулдаг байна. Гэвч барьцаа байршуулаагүйгээс болж маш олон компани нөхөн сэргээлтээ хийхгүй, эвдэрч сүйдсэн олон га газрыг орхиж байна. Үүнийг нь хэзээ хойно төр өөрийн мөнгөөр, тодруулбал татвар төлөгчдийн мөнгөөр нөхөн сэргээдэг гажиг тогтолцоо энэ салбарт байна. Тухайн компанид нь ямар ч хариуцлага тооцдоггүй. Энэ гажуудлыг дээрх хуулиар зохицуулах юм.

---