Холбооны Бүгд Найрамдах Нигери Улсын иргэн Адекола Олавасен Азеез дахиад их хэмжээний хар тамхи хадгалж, борлуулах гэж байсныг хууль сахиулагчид илрүүлэн шалгаж байгаа билээ.

Түүнийг олон улсын тээврээр “бараа”-гаа хүлээж авсан гэж зарим эх сурвалж хэлж буй бол өөр нэг хэсэг нь өнгөрсөн онд баригдахаасаа өмнө нууж үлдээснийгээ аваад борлуулахыг завдсан хэмээж байна.

Юутай ч Адекола Олавасен Азеез, Анози Дарлингтон Дон болон Монгол Улсын иргэн У.Ариунзул нарт холбогдох хэргийн нэмэлт ажиллагаа дуусаж, НПГ-аас Эрүүгийн хуулийн 18.5-3, 20.7-2 дахь хэсэгт заасан хилээр мансууруулах бодис нэвтрүүлсэн, худалдах зорилгоор уг бодисыг олж авч хадгалсан, тээвэрлэсэн гэх үндэслэлээр яллах дүгнэлт үйлдэн Чингэлтэй дүүргийн Эрүүгийн хэргийн анхан шатны шүүхэд хүргүүлээд байна.

Тус шүүх өнгөрсөн оны арванхоёрдугаар сард дээрх гурван хүнд холбогдох хэргийг хэлэлцээд А.О.Азеезид нийт зургаа, А.Д.Дон, У.Ариунзул нарт тус бүр гурван жил хорих ял шийтгэсэн. Нийслэлийн Эрүүгийн хэргийн давж заалдах шатны шүүх өнгөрсөн гуравдугаар сарын 5-нд анхан шатны шүүхийн шийтгэх тогтоолыг хүчингүй болгож хэргийг прокурорт буцаасан юм.
Улмаар үргэлжлүүлэн цагдан хорьсон бөгөөд үргэлжлүүлэн хорих саналаа прокурорын байгууллагаас шүүхэд хүргүүлсэн атал долдугаар сарын 22-нд А.О.Азеез, А.Д.Дон нарыг суллаж, Монгол Улсын хилээр гарахыг хязгаарлах таслан сэргийлэх арга хэмжээ авчээ.

Гэтэл А.О.Азеез нь өнгөрсөн сарын 20-нд Баянгол дүүрэг дэх түр оршин суух байрандаа метамфетамины агууламжтай мансууруулах бодисыг худалдах зорилгоор хадгалж байсан нь тогтоогдсон юм. Өдгөө Нигерийн иргэн А.О.Азеезид Эрүүгийн хуулийн 20.7-2 дахь хэсэгт заасан худалдах зорилгоор мансууруулах бодис хадгалсан үндэслэлээр яллагдагчаар татан цагдан хориод байна. Өөрөөр хэлбэл, түүний холбогдсон нэг хэргийг нь Чингэлтэй дүүргийн шүүх өнөөдөр урьдчилсан байдлаар хэлэлцэх бол нөгөө нь ЦЕГ-ын Хар тамхитай тэмцэх газарт үргэлжлүүлэн шалгаж буй юм.

---