ОХУ-ын төрийн өмчит "РЖД" буюу "Оросын төмөр замууд" компани илүү урт ор, тасалгаа хоорондох тусгаарлагч, мөн шүүгээ бүхий шинэ унтлагын галт тэрэгнийхээ загварыг танилцуулжээ.

Вагоныг Москва дахь Павелецкийн төмөр замын буудлын талбайд суурилуулаад байгаа аж. Энэхүү шинэлэг загвартай галт тэргийг "Оросын төмөр замууд" компанийн холын зайн тээврийн үйлчилгээ эрхэлдэг охин компани "ФПК"-ийн захиалгаар "Трансмашхолдинг" компани үйлдвэрлэсэн гэнэ.

Уг төслийн загвар зургийг анх 2019 оны арваннэгдүгээр сард танилцуулж байсан бол одоо вагоныг бодит амьдрал дээр харах боломжтой болсон байна. Вагоны дотор тал ердийн галт тэрэгнийхтэй адил аж. Дөрвөн хүний суудалтай тасалгаа болон хоёр хүний хажуу талын суудалтай.

Гэхдээ тасалгаанд шүүгээ суурилуулж өгсөн бөгөөд зорчигчид ачаа тээш, гутал, хувцсаа хийх боломжтой байна. Мөн тасалгаа хооронд тусгаарлагч хаалт хийсэн ба иргэд үүнийг хүссэнээрээ хөдөлгөж, холдуулж болох аж.

Түүнчлэн залгуур, USB оролт болон тасалгаа бүрийн гэрэлтүүлгийг бодолцож үзжээ. Галт тэрэгний дотор шийдэл цайвар шаргал өнгөөр ​​хийгдсэн байна.

Эх сурвалж: Риа Новости

---